Y awor huy for di pasionannan di hubentud,, y busca husticia,fe, amor,y pas,hunto cu esnan cu ta yama,na Senjor,for di un curason puro.Ma rechasa speculacion bobo,y ignorante,sabiendo cu nan ta produci pleitu.
Y e sirbido di Senjor no mester ta pleitado, ma carinjoso cu tur hende,cu capacidad pa sinja,cu pasenshi pa ora e wordo trata inhustamente.
Cu ta coregi cu suavidad esnan cu ta den oposicion,pa kisas Dios duna nan arepentimento,cu ta hiba na conocemento di e berdad.
Y nan bin na nan sano huicio y scapa for di e trampa di diabel, den cual e a tene nan preso pa haci su boluntad.( 2 Timoteo 2: 22-26).
Hopi biaha hende ta puntra tocante sano huicio, awor un ehempel di sano huicio ta ora e yiu prodigo a bin bij, y e a reconoce cu na cas di su tata, hasta e trahador contrata ( Lucas 15:17) tin pan nan abundiancia, y e pa motibo di su rebeldia, por poco ta come cuminda di porco, pesey e a dicidi di bay bek cas di su tata.
Sano huicio ta wordo demostra ora Saulo di Tarso a comberti y a stop di persigi cristiannan y Dios a haci Saulo un homber, cu ta ricibi revelacion di Dios, y cambia su nomber y yame Pablo, y awe nos tur conoce Apostol Pablo. Un homber cu den su ignorancia tabata un malbado, pero despues di su encuentro cu Hesus, su bida a cambia completamente.( Hechonan 9:1-6).
Sano huicio ta wordo demostra ora Jonas e reconoce cu pa su motibo e barco ta pasa den tormento, pasobra e mes siendo profeta di Dios a desobedece Dios, y purba haci manera e kier, pero Dios a demostra cu e ta Dios Todopoderoso,y a husa laman pa para e biaha di Jonas.( Jonas 1:12-15).
Nos tur mester bini na nos sano huicio y entrega nos bida, completamente na Senjor, duna Cristo Hesus e prome lugar y sirbi Dios cu un curason alegre, pasobra ta E ta nos salbador.
Den Juan 3;16-21, Dios ta mustra cu e oportunidad a wordo ofrece na mundo completo pa bini na nan sano huicio, door di kere den Su Yiu unigenito y wordo salba, y no keda bao di condenacion, pasobra nan no a kere den e Yiu unigenito di Dios.
Pero tin hopi cu ta cabesura, cabes duro, curason duro, caprichoso cu keto bay kier keda biba den pica y inmoralidad, y hopi biaha e interes cu nan tin pa sigi biba robes, enbes di stop, ta den placa, y fama, pero nos tur sa cu ora nos muri, nos no por bay cu nada, pero di berdad nada.
Como cu cada un a ricibi un don special,huse pa sirbi otro como mayordomo di e gracia multiforme di Dios (1 Pedro 4;10).
Esun cu ta papia laga e papia, conforme e Palabra di Dios,esun cu ta sirbi, laga e hacie esaki pa medio di e forsa, cu Dios ta duna, asina cu den tur cos Dios por wordo glorifica pa medio di Hesus Cristo, pa kende ta pertenece gloria y dominio pa semper, y semper. Amen.( 1 Pedro 4:11).
Dios ta yama nos pa sirbi, y no pa bringa otro, tampoco competi cu otro, pasobra no tin nada pa competi , pasobra tur cos ta di Dios, e ta donjo di tur cos,
Si un hende ta sirbi Mi,laga e sigui Mi y caminda Ami ta,eynan Mi sirbido tambe lo ta, si un hende ta sirbi Mi, e Tata lo honre.
Ta un previlegio pa sirbi Dios, den tur circumstancia, tur momento, Pasobra Senjor ta grandi y Poderoso.