Principionan lo keda negocia ?
TRANSPARENCIA, confianza y honestidad ta e base pa cualkier gobierno sincero cu ta respeta su mes y e pueblo, asina lider di partido PPA, Otmar Oduber, a duna di conoce. Apenas na algun ora lew di un constelacion nobo den Parlamento di Aruba cu lo huramenta Diaranson awor, e futuro lider di fraccion di PPA a declara di ta sorprendi con e negosacion nan ta andando pa cu un futuro formacion di e gobierno nobo. Sorprendi pa motibo cu ta constata cu esaki ta worde haci den un secrecia y sin transparencia, un mal pia pa un gobierno sali riba dje.
PUEBLO A VOTA CLARAMENTE PA UN CAMBIO y a duna partidonan FUTURO y PPA un voto cla di confianza, mientras a manda un señal cla pa tanto AVP como MEP di no ta contento cu e doa partidonan mas grandi. Tambe pueblo a manda un señal aun mas cla ainda y raspa na e tres partidonan mas nobo den e constelacion anterior, esta RAIZ, ACCION 21 y MAS, unda a rechasa e tres nan aki na un forma categorico apesar di tawata partidonan relativamente nobo y jong.
SINEMBARGO PUEBLO TAMBE A VOTA PA PROMESANAN HACI. Promesanan di baha gasto den gobierno y pa goberna cu no mas cu 7 minister. A vota pa cumpli cu nos grandinan y aumenta cu 50% nan entrada dentro di e prome 100 dianan di e gobierno nobo. Pueblo a confia cu lo elimina BBO pa bin cu un sistema mas husto di BTW, unda lo duna bek na e pueblo, aumentando nan poder di compra. E pueblo a vota pa un rebajo drastico den e costo di bida y un mihor calidad di salud pa su hendenan.
PPA LO VIGILA DI SERCA cu e gobierno den formacion ta cumpli cu su promesanan di campaña y ta spera cu no ta desfrauda e pueblo votador cu a worde priminti cu cambionan drastico mediante un politica nobo y mas husto. E fraccion di PPA lo responsabiliza e gobierno pa cu esaki mediante control profundo y supervision rigoroso den Parlamento.