E tabata un siman intensivo, exitoso y fructifero y ohala pronto esaki por traduci su mes tambe den proyectonan na Aruba. Prome Minister Evelyn Wever-Croes, e siman aki ta na New York pa e reunionnan di Asamblea General di Nacionnan Uni #UNGA78 na unda cu den e ultimo 3 dianan aki, a atende 25 diferente conferencia, high level events, y reunionnan riba diferente topico, manera derecho humano y topiconan pa empodera hende muhe, adaptacion di clima y infrastructura, energia y pobreza.
Prome Minister a adresa tur tema relevante pa loke ta trata Aruba tanto den e reunionnan como den e conferencianan na unda el a hiba palabra. Tambe Prome Minister a asisti na un evento hopi interesante tocante con pa elimina mas plastic. Un problema mundial grandi ainda ta cu hende ta sigui haci polucion y mayoria biaha e polucion aki ta bay para riba nos beachnan. E Prome Minister a enfatiza cu e forum aki ta necesario y e luga pa pidi atencion pa e tipo di desaroyonan aki.
Den cada session cu Prome Minister a participa, a trece e puntonan padilanti di kico Aruba ta haciendo riba varios tereno entre otro di innovacion, Early Warning System, iniciativanan riba tereno di energia, medio ambiente, avance di turismo, cuido di salud, y educacion. Esaki ta un manera pa purba yega na mas fondo pa acelera nos proyectonan. Awe ta yega e final di e siman intensivo aki, pero tabata un siman exitoso y fructifero pa Aruba y ohala pronto esaki por traduci su mes tambe den proyectonan cu nos por finaliza na Aruba. E ta un honor y orguyo di por representa mi dushi Aruba riba tarima internacional, Prome Minister a expresa.
