Prome Minister Evelyn Wever-Croes: Gobierno di Aruba lo sigui negocia na mesa cu gobierno Hulandes demisionario

Durante siman, a yega e noticia cu Gobierno di Hulanda a cay, y pa cu esaki, Prome Minister Evelyn Wever-Croes, den nomber di Gobierno di Aruba a tuma contacto cu Premier Mark Rutte pa desea su persona tur cos bon den e periodo demisionario. Tambe, Premier Rutte a indica, di ta tuma su retiro como lider politico di VVD hunto cu algun otro lidernan politico mas.

Prome Minister a enfatisa cu pa Aruba nada ta cambia. Durante e periodo cu Gobierno Hulandes ta demisionario, nan por sigui atende e temanan regular, “loopende zaken”, y tur loke ta trata Aruba, ta cay den e categoria ey. Aruba lo sigui na mesa respetuosamente cu Hulanda, mirando cu e debe cu Hulanda a presta Aruba den temporada di Covid, ta madura na October 2023 y pa cu esaki lo mester yega na palabracionnan pa cu financiamento. 

Tambe, Prome Minister a indica cu e combersacionnan ta bayendo bon. El a splica cu Aruba tabata tin varios reunion cu Hulanda riba e tema aki, y lo tin mas reunion den e dianan cu ta bin, cu e meta pa yega na palabracionnan beneficioso pa e comunidad di Aruba. 

“Mi kier sigura e comunidad di Aruba, cu e caida di Gobierno Hulandes, no tin ningun influencia riba Aruba, ni riba e palabracionnan y negociacionnan cu ta andando na e momentonan aki pa cu e debe cu mester wordo paga na luna di October. Nos ta desea tur esnan na Hulanda hopi exito den e periodo aki cu e campaña electoral. Nos sa cu e tempo aki ta rekeri hopi tempo y esfuesro di politiconan, y ta sigur cu tur cos lo bay bon, na momento cu democracia vence y e bos di pueblo wordo scucha”, Prome Minister Evelyn Wever-Croes a expresa.