Diahuebs 3 di februari, Parlamento di Aruba a trata e ley di Landsverordening Instelling Ministerie, LIM cu e keda aproba. LIM ta e ley cu ta institui ministerionan y despues di un formacion di gobierno ta regla legalmente e reparticion di e ministerionan bou diferente minister. Prome Minister Evelyn Wever-Croes a indica cu esaki ta algo cu ta pasa cada 4 aña y ta depende totalmente di e palabracionnan cu ta wordo haci durante formacion.
Sinembargo, mirando e comportacion di oposicion cu tawata na un nivel hopi baho cu insultonan hopi mahos y sin aporte constructive, Prome Minister a compara esaki como un dia scur den democracia di nos pais door di. Ta di aplaudi si con Presidente di Parlamento señor Edgard Vrolijk a maneha e situacion apesar cu oposicion a bay hopi baho, pero na fin di dia e ley a wordo aproba.
Debi na esaki, Fraccion di RAIZ y MEP a presenta un mocion pa asina traha un comision den Parlamento, mirando cuanto critica oposicion tabata tin riba e ley aki. Esaki lo duna e oportunidad pa den Parlamento nan stipula kico nan lo kier mira den un ley asina den futuro anto si mester cambia e ley pa cambie tambe. Prome Minister ta aproba e proposicion aki expresando cu enbes di critica so, oposicion lo mester bin cu sugerencianan constructivo den e caso aki.
Di su banda, oposicion a trece un mocion den cual nan ta haya cu Gobierno mester bay pa 7 minister. Nan a argumenta cu a bay di 7 pa 8 minister cual no ta corecto. Gabinete Wever-Croes I tabata tin 8 minister. A bay campaña na 2017 bisando cu lo baha e cantidad di minister cu AVP tabata tin, esta di 9 pa 7 minister. E tempo ey, pueblo a dicidi cu ta bin un coalicion y den cuadro di coalicion durante di negociacion, a yega na 8 minister. Y Gabinete Wever-Croes II a mantene na 8 minister.
E argumentonan cu door cu Aruba ta den crisis esaki ta e momento pa baha e cantidad di Minister, Prome Minister a expresa, cu e argumento aki no ta valido tampoco. E trabounan na e momento aki ta hopi mas grandi cu prome cu e crisis. Den comparacion, trabou aworaki ta tuma 24 ora pa dia casi 7 dia pa siman. Hopi mas pisa cu e Gabinete Wever-Croes I.
“Na e momento aki e situacion ta hopi mas complica y dificil compara cu aña 2017 pasobra nos no mester goberna e pais aki manera tur otro gobierno a haci sino nabega e crisis, sali di e crisis, y cumpli cu e Landspakket. Dus e trabou pa cada minister ta hopi mas pa cumpli cu ne compara cu antes. Dus si kier haci comparacion, aworaki eigenlijk mester mas minister cu den e gobiernonan anterior pero nos a dicidi di no haci esey.
Diahuebs e ley a pasa y e ministerionan ta institui legalmente segun e palabracionnan cu a wordo haci den formacion. “Mi por garantisa e comunidad di Aruba cu den Gabinete Wever-Croes II bo tin 8 homber y hende muhe cu determinacion grandi pa saca e pais aki di e pandemia y un curashi enorme pa tuma tur paso pa logra esaki y principalmente un curason hopi grandi pa Aruba y e ciudadanonan di Aruba y pa sirbi e pais aki debidamente y corectamente”, Prome Minister a duna di conoce.