E proyekto Career finansia pa Fonds Podium Kunsten ta lansa su prome talento
musikal: Yerson Rosalina, konosí komo Yajro. Un hoben ku resientemente a establese su mes na Boneiru, a tuma su hobby musikal na un nivel profesonal ku guia di su mentor Xemio Jacobs. Yajro, ku ta sinti un fuerte interes den musika urbano, a keda motivá pa kanta un krioyo den konteksto di luna kultural i dia di Rincon.
E piesa “Kabe’ pabou” ta un homenaje na e pueblo di Rincon i e eksperensha di Yajro mes komo un Korsoueno ku ta biba riba Boneiru. Den e letra, e ta konta kon e a tende tokante di Rincon, i kon e aventura a kuminsa ora nan bisa ku e mester bai “kabe’ pabou”. E kanto ta trese un historia di deskubrimentu, kultura i fiesta.
Yajro ta bisa: “E ritmo ta hopi dushi. Mi a siña hopi i mi a sinti un gran orgullo pa por kanta un krioyo. Sigur mi ke forma parti den Kanto Krioyo otro aña!”
E proyekto Career, un inisiativa di ACE Foundation, ku ta trese oportunidad pa hoben i adulto ku tin deseo di bira un artista kantante. Pronto mas talento lo wordu presentá, i tambe lo sali un videoclip di e piesa.