Prome Minister Evelyn Wever-Croes:
“A pesar cu nos ta un isla chikito, nos a logra hopi”
Diamars mainta a tuma luga e Acto Protocolar di e celebracion di Dia di Himno y Bandera unda Prome Minister Evelyn Wever-Croes a duna su discurso refiriendo na diferente tema.
Prome Minister a expresa cu 18 di maart, dia di Himno y Bandera ta un dia pa pone tur diferencia un banda, y celebra ARUBA, nos baranca tan stima.Y nos tin hopi pa celebra. A pesar cu nos ta un isla chikito, nos a logra hopi.
Prome Minister ta subraya:
Aruba ta e unico pais den Reino cu surplus-nan financiero pa 3 aña consecutivo segun College Aruba Financieel Toezicht (CAft).
Aruba ta den top 3 den Caribe den combati labamento di placa y den combati financiamento di terorismo segun Caribbean Financial Action Task Force (CFATF)
Aruba ta e pais mas sigur den nos region, segun “The Telegraph” di Inglatera,
Nos Eagle Beach ta e beach #1 den Caribe, y #3 den mundo, segun Trip Advisor.
Den innovacion, nos tin e “Aruba One Happy Pass”.
Aruba a hala atencion internacional tambe, debi na e cantidad grandi di hende muhe den liderazgo, den e articulo “Aruba: Where Women Lead” di The New York Times.
“Desde un punto di bista internacional, Aruba a desaroya den un isla fuerte, resiliente y exitoso den Caribe y nos ta un isla pionero den turismo, pa henter mundo”.