Politica

Rocco Tjon: Introduccion di fact-teams ta duna resultado positivo


ORANJESTAD, Aruba

Peticion di Parlamento, miembronan di e comishon fiho di Husticia den Parlamento a haya un presentacion amplio di “veiligheidshuis”. E reuion tawata cu sra. Beurnice Schulte. Sra. Schulte ta procesmanager veiligheidshuis y di profesion un ortopedagogo y terapista di famia. 

KICO TA UN VEILIGHEIDSHUIS

Den practica e veiligheidshuis, cual ta resorta na Ministerio Publico, ta percura pa un cooperacion entre e diferente organisacionnan den e cadena hudicial, social y cuido. Algun partner ta entre otro Ministerio Publico, FCCA, FMAA, Directie Onderwijs, KIA y Cuerpo Policial. E partnernan aki ta traha hunto pa atraves di accionnan pro-activo y integral yega na solucionnan pa hobennan cu ta riba e rumbo robes, pa casonan di violencia domestico, pa casonan di abuso, pa situacionnan cu ex-detenidonan ta haya nan mes aden y pa casonan caminda personanan ta causa molester pa orden publico.

Na prome instancia ta trata akinan cambio di e manera di traha pa e cadena. Na mes momento literalmente tambe e oficina ta fungi como un cas, caminda tur e profesionalnan di e diferente partners menciona ta sinta hunto pa dicidi kico ta e mihor maneho pa atende cu e diferente casonan cu ta wordo presenta. Esaki ta percura pa casonan por haya solucionnan mas rapido y duradero.

META DI E VEILIGHEIDSHUIS

E meta principal ta pa preveni recidivismo y problemanan den nos comunidad. Pues brinda cuido na esnan cu tin mester di esaki y percura pa seguridad. Na mes momento nan tin un funcion pa señala problemanan trempan, atende cu esaki na un manera integral, pa asina evita cu e ta bira un problema mas grandi.

E enfoke ta riba hobennan cu ta core riesgo pa cay den criminalidad of adiccion. Personanan cu tin problemanan di salud mental y adiccion, y cu mester di ayudo psychiatrico. Pero tambe ta brinda atencion na victimanan di violencia domestico. Den su totalidad e trabounan mester percura pa un solucion rapido pa e gruponan aki pa asina preveni, un asina yama ZSM-aanpak.

FACT TEAMS

Un punto cu a wordo treci pa dilanti ta e resultado positivo di e introduccion di “factteams” E idea di Fact Teams tawata pa enfoka riba problema di adiccion Cerca muchanan y hobennan y brinda e cuido ambulatorio. E dunador di cuido ta bay na cas di e famia y yuda esun cu ta den problema. Sra. Beurnice a duna di conoce cu e mas di 200 casonan cu nan a atende cune aña pasa, e parti di mas grandi tin di haber cu aspectonan di adiccion. Fact Teams ta un idea y proyecto di Minister Dangui Oduber y a wordo introduci na 21 di september 2019.

PA CONCLUI

Un peticion cu a wordo haci na e Parlamentarionan presente ta pa wak e posibilidad pa amplia e cantidad di Fact Teams, esaki mirando e resultado positivo. Fraccion di MEP lo haci preguntanan por escrito pa wak e posibilidad pa logra esaki den e presupuesto 2020.


Related posts

Minister Armando Rudy Lampe : Cantidad di studiante di Emma School y Paso Pa Futuro ta yega den un solo scol

EA News Author

Preocupacion den pueblo pa Minister di Finansa atende cu 1.3 biyon

EA News Author

Marisol Lopez Tromp ta prome mandatario cu a keda baha como minister den Reino Hulandes

EA News Author

Leave a Comment