E organisashon Stichting Miss IQ a hasi un bishita di kortesia na Sentro di Detenshon i Korekshon Kòrsou (SDKK).
Stichting Miss IQ ta un organisashon Hulandes ku regularmente ta hasi donashon na skolnan i instansianan di hòben aki na Kòrsou. E donashonnan ta entre otro den forma di material, muebel pa skol, artíkulonan pa hasi deporte i tambe muzik. Durante e bishita, Stichting Miss IQ a presentá tur loke e organisashon ta hasi diariamente i tambe kon den futuro e dos organisashonnan por traha huntu. Den un ambiente hopi ameno por a interkambiá riba e nesesidat pa material ku prizon mester, pa asina por sigui traha riba formashon di SDKK su klientenan.
Na e okashon aki tabata presente e boluntarionan di Stichting Miss IQ, personal di guia di aktividat di SDKK, personal di deporte, Hefe di OVT (Opleiding, Vorming en Training) i tambe bosero di SDKK.
