Parlamento di Aruba a habri porta pa ricibi dos klas di Havo 4 di Colegio Nigel Matthew, relaciona cu e materia Staatsinrichting. E bishita educativo aki a tuma luga den sala di reunion di Parlamento.
Como miembro di Parlamento, sigur mi ta mira e importancia pa asisti na e reunion interactivo aki, caminda e studiante a trece preguntanan relevante y interesante tocante e manera con Parlamento ta traha y tuma decision, kico ta e proceso pa aproba y traha ley, y con e fraccionnan den Parlamento ta y of por influencia decisionnan importante. Sigur como parlamentario mi a experencia e grupo aki como studiantenan motiva, atento pa cu desaroyonan politico y cu nan ta dispuesto pa participa den e dialogo directo cu nos como representante di pueblo.
Mi a haci uzo di e oportunidad pa bisanan cu ta hopi haya hopi remarkabel nan nivel halto di interes den politica, cu nan ta bon na altura y a haci bon uzo di e oportunidad pa haci algun pregunta critico y cayente cu e hobenan a haci. Nan a haci preguntanan encuanto entre otro formacion di gobierno actual, proceso di screening , corupcion y integridad y nan no a duda pa expresa nan opinion y busca claridad. E reunion a crea un ambiente positivo y inspirativo pa tur esnan presente.
Mi a yama danki na e docentenan di Colegio Nigel Matthew pa a haci e peticion pa e reunion educativo aki. Ta importante pa sigui crea espacio pa por sigui educa nos hubentud pa nan compronde su rol den e desaroyo di Aruba su democracia y pa nan compronde trias politca, prinicipalmente e diferencia entre gobierno y parlamento.
Mi kier termina bisando un biaha mas cu mi a keda hopi impreciona cu e entusiasmo y preguntanan critico di e hobennan di Colegio Nigel Mattew. Esaki ta mustra cu nos tin un generacion nobo cu ta cla pa tuma responsabilidad y sigui traha riba un futuro mihor pa nos pais. E reunionnan aki sigur ta un manera pa nos sigui traha pa trece Parlamento mas serca di pueblo, inclusief nos hubentud, y pa stimula nan participacion y formacion civico desde awor.
