Varios sindicatonan di Aruba ta expresa nan descontento despues cu Parlamento no a duna ningun reaccion na e peticionnan ripiti pa tene un reunion tocante e Rijkswet HOFA, e ley di Reino pa supervision financiero. Segun e representantenan sindical, te awor nan a manda dos carta formal na Parlamento di Aruba, unda nan ta expresa nan preocupacion y desacuerdo cu e ley di HOFA. Sin embargo, te dia di awe Parlamento no a duna respuesta of invitacion pa dialogo.
Lider di fraccion di PPA, Eduard Pieters, a expresa su lamentacion pa e falta di accion di Parlamento. El a recorda cu den e prome carta tabatin 13 sindicato cu a firma pa mustra nan posicion contra e Rijkswet HOFA. Pieters a bisa cu e sindicatonan ta defende transparencia y maneho financiero responsabel, pero nan ta kere cu supervision financiero mester busca otro via, sin implementa e ley di Reino cu ta riba mesa actualmente.
Riba 10 di november 2025, e sindicatonan a manda un di dos carta na Parlamento, pidiendo un reunion publico cu participacion di tur fraccion parlamentario. E meta ta pa tur miembro di Parlamento por tende cla e postura di e sindicatonan y nan miembronan. Despues cu e carta a yega Parlamento, tanto e fraccion di PPA como di MEP a pidi un punto di orden pa schors e sesion y duna e sindicatonan oportunidad pa presenta nan punto di bista. Sinembargo, presidente di Parlamento, Marlon Sneek, a nenga e peticion, eliminando e posibilidad pa e sindicatonan por dirigi Parlamento formalmente.
E 13 sindicatonan involucra ta representa un gran grupo di trahadonan Arubiano homber y muhe cu ta traha tanto den sector publico como priva, y cu a contribui na desaroyo di Pais Aruba. Nan ta bisa cu lo sigui insisti riba dialogo y transparencia, pero ta lamenta manera Parlamento a maneha nan peticion riba un tema cu ta di gran importancia pa pueblo Arubiano.