Recientemente, Ministerio di Husticia, hunto cu su socio di implementacion United Nations Office for Project Services (UNOPS), a duna bonbini na e “Prefecto nobo” di Saint-Barthélemy y Saint-Martin, Cyrille Le Vély, su hefe di gabinete Marie-Hildegarde Chauveau y representantenan di Agence Publique pour l’Immobilier di Justice (APIJ) pa un reunion di trabao enfoca riba reforma di prizon y oportunidadnan pa fortalece cooperacion entre e banda Frances y esun Hulandes di e isla.
E reunion tabata tin como meta pa fomenta dialogo, intercambia conocemento tecnico y explora areanan di interes mutuo tocante e iniciativanan di infrastructura correcional cu ta tumando logra na tur dos banda di Saint-Martin/Sint Maarten.
Durante e reunion, Minister di Husticia Nathalie M. Tackling a duna un contexto historico di e trayectorio di reforma correcional di Sint Maarten, y e desaroyonan cu a hiba na e esfuersonan actual di reforma den e sistema di detencion. E Minister a splica con sentencianan internacional a resalta e necesidad pa mehoracion nan structural, locual a pone Sint Maarten riba un caminda pa un reforma integral.
Como parti di e esfuerso di reforma aki, e Ministerio a duna UNOPS e encargo pa implementa e componente di infrastructura di e Programa di Reforma di Sector di Detencion (DSRP), enfoca riba reconstruccion di Prizon di Point Blanche. Durante e reunion, UNOPS a duna un presentacion tecnico riba e proyecto, cu tin un balor di aproximadamente USD $52 miyon. Esaki ta introduci un modelo correcional moderno cu ta bay mas leu cu e sistema tradicional di simplemente “cera hende”, integrando siguridad, rehabilitacion y un maneho structural di e presonan. E diseño ta incorpora un modelo centra riba rehabilitacion cu ta cumpli cu standard nan internacional di detencion, integrando consideracion nan social, di genero, ambiental y di sostenibilidad.
E facilidad ta wordo diseña cu unidadnan di vivienda diferencia pa varios categoria di preso, permitiendo pa e personanan move entre e unidadnan basa riba nan comportacion y progreso di rehabilitacion. E diseño ta inclui tambe ambientenan enfoca riba terapia y salud mental, reflehando e miho practicanan internacional cu tin como meta pa reduci re-ofensa y apoya reintegracion den sociedad.
“Den e Estadonan Islario den Desaroyo di Caribe, fortalesemento di e regla di derecho ta esencial pa institucionnan resiliente y stabilidad a largo plaso,” William Squier, Portfolio Development Advisor pa UNOPS na Latino America y Caribe, ta sigura. “Den contexto nan manera esun di Sint Maarten su geografia di hurisdiccion dual, un cooperacion mas estrecho y un cadena di husticia mas integra ta critico. Basando riba nos experiencia apoyando reformanan di infrastructura di husticia na Sint Maarten y Aruba, UNOPS ta comprometi pa brinda e experticio tecnico necesario pa avansa sistemanan correcional moderno y enfoca riba rehabilitacion.”
E delegacion Frances a expresa interes particular den e metodologia di construccion y e enfoke di desaroyo pa fase cu ta wordo aplica na Sint Maarten. Durante e intercambio, e autoridadnan Frances a comparti cu actualmente nan ta explorando e posibilidad di construi un facilidad di prizon nobo cu ta aplica tecnicanan cu ta reduci costo y ta acelera e tempo di construccion. Perfecto Cyrille Le Vély a enfatisa cu, pa un reintegracion efectivo, ta preferibel pa e detene nan di e banda Frances di e isla wordo hospeda localmente en bes di den exterior.
“Nos mester fortalece e lasonan di cooperacion cu ta uni e banda Frances y e banda Hulandes riba temanan di siguridad pa asina por traha sistemanan relevante. Den e sentido aki, mantene un dialogo banda di nos respectivo proyectonan ta parce tanto strategico como necesario pa crea facilidadnan adecua na tur dos banda di e isla,” Cyrille Le Vely a declara.
Minister Tackling a enfatisa cu e esfuersonan di reforma di Sint Maarten ta bay mas leu cu infrastructura so. “Personanan cu ta drenta e sistema di husticia hopi biaha ta yega ey pasobra e sistemanan rond di nan a faya anteriormente,” e Minister a bisa. “Nos obhetivo no ta simplemente pa detene hende, sino pa percura cu ora nan sali for di e sistema, nan ta miho prepara pa reintegra den sociedad. E edificio ta importante, pero igualmente importante ta e programanan, e personal y e structuranan cu ta apoya rehabilitacion.”
E discusionnan a cubri desafionan comparti relaciona cu infrastructura di detencion, presion di capacidad y strategianan di rehabilitacion, resaltando e importancia di un dialogo continuo y intercambio tecnico entre e dos bandanan di e isla. Tambe a explora posibel rutanan pa colaboracion den futuro, incluyendo intercambionan tecnico continuo cu UNOPS y e posibilidad di un cooperacion operacional mas profundo.
Despues di e reunion, e delegacion a haci un recorido den e prizon, caminda nan a haya un bista mas di cerca riba e plannan di infrastructura y e obhecionnan di reforma cu ta guia e desaroyo di e futuro facilidad.
Ministerio di Husticia a mira e bishita aki como un paso importante den fortalecemento di un cooperacion constructivo entre e banda Frances y Hulandes di e isla, reconociendo cu tur dos hurisdiccion ta enfrenta desafionan similar y por beneficia di un intercambio continuo di conocemento.
Ambos partido a expresa interes pa mantene e dialogo y explora mas oportunidad pa colaboracion den futuro.