Ta ekstendé e supervishon finansiero pa Kòrsou i Sint Maarten, manera reglá
den e Rijkswet financieel toezicht Curaçao en Sint Maarten (Rft, Lei di Reino
supervishon finansiero Kòrsou i Sint Maarten). Dia 4 di òktober, Konseho di
Minister di Reino a disidí esaki a base di e konseho di e komishon di
evaluashon Rft 2024 pa e periodo 2021-2023. Awe, Sekretario di Estado Szabó
ta manda un karta i e informe di e Komishon di evaluashon pa Eerste i Tweede
Kamer.
Den su informe e komishon di evaluashon, ku ta konsistí di ekspertonan
independiente di Kòrsou, Sint Maarten i Hulanda, ta konkluí ku ainda e dos paisnan
no ta kumpli strukturalmente ku e normanan presupuestario for di e Rft. E komishon
ta trese dilanti ku e pandemia di Covid tabatin un kontribushon signifikante den esaki.
No opstante rekuperashon di e ekonomia despues di e pandemia di Covid, e
komishon ta konsiderá ku terminashon di e supervishon na e momentu aki no ta
posibel. Pues, e supervishon ta sigui na vigor. Un siguiente evaluashon lo tuma lugá
pa mas tardá na aña 2027.
E komishon ta hasi tres rekomendashon importante: desaroyá un kuadro di
evaluashon, hasi mihó uso di e posibilidatnan legal den e Rft, i garantisá institutonan
independiente. Asina, e komishon di evaluashon ta bisa ku e Kolegio supervishon
finansiero (Cft) i e paisnan konhuntamente mester desaroyá un kuadro ku kua por
establesé ophetivamente si ta kumpli ku e normanan presupuestario. Ademas, e
komishon ta mustra riba e posibilidat di e paisnan pa, denter di e normanan di e Rft,
por hasi invershonnan stratégiko. Finalmente, e komishon ta boga pa fortfikashon
mas aleu di e base di e finansanan gubernamental dor di establesé institushonnan
fuerte, independiente.
Sekretario di Estado Szabó: “e meta di e lei ta i lo sigui ta finansanan gubernamental
duradero i bon maneho finansiero. Esaki ta un kondishon básiko esensial importante
pa e abilidat di e paisnan pa nan por yuda nan mes. Gustosamente lo mi sigui traha
konhuntamente ku e paisnan riba e trayekto importante aki.”
E paisnan Kòrsou i Sint Maarten a indiká ku nan ke tin perspektiva riba un futuro sin
supervishon. Pa e motibu aki, Konseho di Minister di Reino a invitá e dos paisnan pa,
konhuntamente ku Cft i ku Hulanda, sigui traha riba finansanan gubernamental
duradero i bon maneho finansiero.
Konseho di Minister di Reino ta ehersé e supervishon, miéntras ku Cft tin un papel di
señalá i konsehá. E Rft a drenta na vigor na aña 2010, i tabatin un durashon di sinku
aña. Por ekstendé e supervishon, despues di evaluashon, kada biaha ku 3 aña.
Supervishon finansiero ekstendé pa Kòrsou i Sint Maarten
