Resientemente Tourism Corporation Bonaire (TCB)
a uni forsa ku vários partner den sektor privá i a partisipá na un roadshow pa merkadeo i
kòmbersashon di benta na New York pa promové e buelonan nobo for di JFK pa Boneiru
ku JetBlue. E roadshow akí a dura un siman largu. No muchu tempu pasá JetBlue, den
kolaborashon ku TCB, Entidat Públiko Boneiru, BIA i BONHATA, a anunsiá lansamentu di
buelonan nobo entre JFK i Boneiru for di 5 di novèmber di e aña akí durante henter aña
riba djamars i djasabra.
Den e siman di 9 pa 13 di sèptèmber, TCB huntu ku Captain Don’s Habitat Bonaire,
Chogogo Beach & Dive Resort Bonaire, Delfins Beach Resort, Divi Flamingo Beach & Dive
Resort Bonaire, Fiesta Tours Bonaire, Grand Windsock Bonaire, Harbour Village Beach
Club i Plaza Beach & Dive Resort Bonaire a partisipá na un roadshow promoshonal na
New York City i Long Island. E delegashon di Boneiru tabatin un happy hour interaktivo
estilo Meet & Greet ku e mihó medionan di komunikashon i influencer-nan di New York,
for di Condé Nast Traveler te sensashonalistanan riba medionan sosial. Durante e evento
e medionan di komunikashon i influencer-nan a hunga ‘Bonaire Bingo’, kaminda nan a
haña sa mas tokante nos isla Boneiru pa medio di meskla ku e partnernan di nos isla i
kòmbersá ku nan. E siguiente dia e tim di Boneiru a organisá un Bonaire Evening
Networking Event, kaminda e delegashon tabatin un enkuentro ku e bendedónan por
mayor mas importante di rekreashon ku ta aktivo den área karibense, i ku ke amplia nan
portofolio agregando Boneiru na esaki. Durante henter e evento e wéspetnan por a
eksperensiá un parti di e kultura i kalor di nos isla ku músika boneriano den bèkgrount,
pasaboka i kos di bebe inspirá pa Boneiru i tambe material di ilustrashon. Riba e último
dia e delegashon tabatin un lùnch interesante ku komersiantenan importante den
rekreashon na Long Island, kaminda kada partner a haña oportunidat pa presentá su
propiedatnan i servisionan úniko na e grupo.
E delegashon boneriano tabatin un enkuentro tambe ku e tim di Arena Destination
Marketing, un prominente agensia komersial ‘full-service’ na New York City, i nan a
interkambiá di idea i punto di bista tokante e posibilidatnan pa merkadeo i e asina yama
‘Meetings, Incentives, Conferences and Exhibitions – MICE’ den futuro pa nos isla.
Durante e siman akí e tim di TCB tabatin un tremendo enkuentro tambe ku partnernan di
JetBlue, kaminda a deliberá tokante e plannan di akshon i e esfuersonan kombiná di
merkadeo pa un ruta nobo eksitoso for di JFK pa Boneiru.
Gustosamente TCB ke gradisí tur partner ku a partisipá na e roadshow pa merkadeo i
kòmbersashon di benta na New York. Ku añadishon di e buelonan nobo entre JFK i
Boneiru ku JetBlue nos ta anhelá pa yama bon biní na mas bishitante for di e área di Tri-
State.
