Tourism Corporation Bonaire (TCB), den
kolaborashon ku Entidat Públiko Boneiru, Bonaire Hotel and Tourism Association
(BONHATA) i kapitan di haf di Boneiru, dia 27 di febrüari 2026 na Delfins Beach
Resort a organisá e bista general di turismo di aña 2025 i e ekspektativanan pa aña
2026 pa Boneiru.
“Nos ke hasi e traspaso di kantidat pa kalidat. Nos enfoke mester ta riba
bishitantenan ku ta respetá i sostené nos medio ambiente, nos kultura i nos
komunidat,” segun Patricia Veen, konsehero di diputado Weber.
Durante nos bista general di turismo nos a tuma tempu pa na un manera
transparente wak bèk riba aña 2025, i kompartí e sifranan mas resien di turismo, e
prestashonnan di merkado i e impakto ekonómiko mas amplio di e sektor na
Boneiru. Na mes momentu nos a presentá nos enfoke pa aña 2026, kaminda nos a
duna splikashon di nos metanan, nos KPI-nan (indikadónan krítiko di prestashon),
nos prioridatnan i nos inisiativanan stratégiko pa e aña binidero.
E diskushon tabata habrí i konstruktivo. Preguntanan krítiko i diálogo signifikativo
tabata bon biní, pasobra si nos tuma e sektor di turismo di Boneiru na serio, nos
mester ta honesto tokante tantu e oportunidatnan komo e retonan. Turismo
sostenibel no ta surgi outomátikamente; e ta rekerí eskohonan bon konsiderá, un
direkshon di maneho klarito, i un kolaborashon fuerte.
“Ora nos wak padilanti, nos kompromiso ta keda evidente: manehá turismo na un
manera responsabel pa medio di enfoká riba balor, eksperensia di bishitante i
sostenibilidat riba término largu. Esaki nos por logra solamente den kolaborashon ku
gobièrnu, nos partnernan den e sektor i nos komunidat. Turismo mester sigui generá
impakto ekonómiko i na mes momentu protehá loke ta hasi Boneiru úniko. E ekilibrio
akí ta nos responsabilidat konhunto i nos ambishon kompartí”, segun Elesiër Angel,
direktor di Tourism Corporation Bonaire.
“Na aña 2025 Boneiru a konosé un logro importante pa medio di bai bèk na e nivel di
okupashon di hotèl di promé ku COVID-19, ku un kresementu fuerte di benta. Aunke
ku esaki ta proba resiliensia di e sektor, BONHATA ta enfatisá ku desaroyo turístiko
sostenibel ta rekerí un planifikashon bon konsiderá i kolaborashon stratégiko den e
sektor. Kresementu no ta dependé di ekspanshon di kapasidat di akomodashon,
sino di merkadeo dirigí, mihó plamamentu di bishitantenan, un oferta di produkto
mehorá i kolaborashon estrecho entre gobièrnu, TCB, kompanianan aéreo i
akomodashonnan lokal. BONHATA ta suprayá ku un maneho turístiko evidente ta
esensial, ya ku sin esaki, turismo ta kore riesgo di desaroyá su mes na un manera
no-koordiná, bou di influensia di preshon eksterno enbes di vishon propio di nos isla.
E vishon akí ta di importansia krusial pa garantisá ku e desaroyo ta keda balansá,
sostenibel i favorabel pa tantu nos isla komo nos poblashon lokal”, segun Veroesjka
de Windt, direktor di BONHATA.
Kapitan di haf Günther Flanegin a bisa lo siguiente: “Nos a opservá un kambio den
demanda pa turismo krusero na Boneiru na aña 2025, ku tabata un aña positivo i
balansá. E barkunan Ritz Carlton i MSC Explora ta pertenesé na e barkunan mas
chikitu i mas luhoso ku a bishitá nos isla. Banda di esaki nos a yama bon biní na e
promé barku di Corendon, di manera ku awor akí turistanan krusero por subi barku
na Kòrsou tambe.”
