Tourism Corporation Bonaire (TCB) un biaha mas a partisipá eksitosamente na e Bolsa Internashonal di Turismo (International Tourism Fair – ITB) di e aña akí na Berlin. Huntu ku e partner hotèl Grand Windsock Bonaire, e destinashon a presentá su mes na e stènt di Hulanda i a atraé hopi interes for di e merkado di abla aleman (DACH – Alemania, Oustria, Suisa).
Komo un di e bolsanan turístiko mas importante na mundu, e aña akí ITB a atraé mas ku 100.000 bishitante komersial, loke a brinda un plataforma ideal pa sigui promové Boneiru komo un destinashon úniko i sostenibel serka biaheronan i e industria di biahe. Den numeroso kòmbersashon ku operadornan di tour, periodistanan, i ekspertonan for di e sektor, a pone énfasis riba potensial di e paraiso hulanda karibense komo un destinashon popular pa amantenan di naturalesa i bishitantenan ku ta entusiasmá ku deporte akuátiko.
E aña akí pa promé biaha Nicole Witte, direktor di Witte Tourism a representá TCB. Elesiër Angel, direktor statutario interino di TCB, a enfatisá: “Partisipashon na ITB 2025 tabata un éksito grandi pa Boneiru. E demanda fuerte for di e merkado di abla aleman ta konfirmá nos kompromiso pa sigui posishoná Boneiru komo un destinashon sostenibel i eksklusivo. Nos ta hopi kontentu ku e kontaktonan balioso i numeroso kòmbersashonnan ku tabatin, ku lo kontribuí na ampliashon mas aleu di nos presensia den e region di DACH.”
E éksito di ITB 2025 lo yuda Boneiru kontinuá riba su rumbo pa sigui fortifiká nos isla komo un destinashon di biahe favorito pa e merkado di abla aleman. TCB ya kaba ta planiando mas esfuerso pa den un forma sostenibel oumentá e interes i demanda for di e region akí.
Un danki spesial ta bai na Grand Windsock pa a ‘highlight’ e akomodashonnan ku Boneiru tin pa ofresé, inkluyendo nan bunita villa i apartamentunan.
