“Pami e relatonan aki ta mi legado pa e pueblo di Aruba”
Dialuna atardi Prome Minister Evelyn Wever-Croes tabata na Biblioteca Nacional pa asina haci entrega di e relato anual 2024 di Ministerio di Asuntonan General y Infrastructura. Esaki ta e relato anual cu Prome Minister ta traha tur aña hunto cu tur e hefenan di e departamentonan bou di su ministerio. E relato aki ta consisti di tur e logronan di e gobierno, tur e retonan cu a enfreta, tur loke gobierno no a logra y di ki manera lo bay traha na logra esakinan.
Prome Minister a indica cu desde e prome aña completo den gobernacion na 2018, el a traha e prome relato, y despues cada aña a sigui cun’e y a publik’e pa asina comunidad en general por tin acceso na dj’e. Tambe e mandatario ta entrega, tur aña, un copia di e relato anual na Biblioteca Nacional cu ta pon’e den e departamento di Arubianita pa asina e bira parti di nos historia. Cu esaki tur e trabounan cu a wordo haci hunto no ta wordo lubida paso e ta graba den tur locual cu ta e archivonan importante na Biblioteca Nacional.
“Mi ta conisdera esaki un clausura di e bunita temporada cu mi tabata Minister President pa 7 aña y mei. Mi ta sumamente orguyoso cu di cada un di e 7 añanan aki tin un relato na Biblioteca Nacional cu futuro generacionnan por bay lesa y asina por educa nan mes riba tur e trabounan valioso haci pa Gabinete Wever-Croes I y II. Den e relato nan lo siña kico gobierno a haci durante e pandemia mas grandi na mundo Covid-19, tur e retonan/ negosiacionnan cu Hulanda pa cu esaki, e crisis cu Venezuela, y e crisis ora Merca a cambia gobierno. Pami e relatonan aki ta mi legado pa e pueblo di Aruba” Prome Minister a expresa.
