CEDE ARUBA, den colaboracion cu ATA (Aruba Tourism Authority), cu orguyo ta presenta VIBRACION CULTURAL, un serie completamente nobo di festival cultural diseña pa celebra y fortifica bida comunitario a traves di eventonan regular cu ta resalta e rikesa artistico y diversidad cultural di Aruba.
Mientras VIBRACION CULTURAL lo explora varios tema cultural den su edicionnan, di festivalnan tradicional te cu arte culinario y herencia local, e prome edicion ta cuminsa cu un Festival di Musica local di dos anochi riba 20 y 21 di juni na Centro di Bario Noord.
Segun Director di CEDE ARUBA, Daniel Tecklenborg:
“VIBRACION CULTURAL ta mas cu djis un plataforma pa entretene – e ta un plataforma dinamico cu ta amplifica e curason di nos barionan. Via musica, arte y cultura, e serie aki ta duna barionan e espacio pa comparti nan “Storianan”, tradicionnan y creatividad. Cada edicion lo trece algo diferente, y nos ta orguyoso pa cuminsa cu e prome edicion carga pa e ritmo vibrante di nos artistanan local.”
VIBRACION CULTURAL, Volumen 1 ta presenta ocho artista local cu nan musica original. E evento na mes momento lo ta tambe e presentacion final di un otro proyecto di CEDE ARUBA, cu apoyo di Fonds voor Podiumkunsten y den colaboracion cu UNOCA y productor Michael Lampe. E iniciativa ta apoya productornan y artistanan local den creacion di musica original, cu e meta di impulsa talento pa escenanan regional y hasta internacional.
E evento ta completamente gratis y habri pa publico, lo tin stand di cuminda local, bendedornan artesanal y un bar vibrante, tur diseña pa uni e bario.
Lineup di Artista
Riba diabierna 20 di juni, e festival lo presenta:
• 7:15 PM Sendy Loefstop, cu Pop alternativo fresco y vibra di Indie Productor: Ivan Quandus
• 8:15 PM BandiLama, mesclando Rock, Ska y Reggae Productor: Jeremy Bonaribba
• 9:15 PM activemirror, un banda di rock Indie/alternativo Productor: Amal Farhat-Kasouf
• 10:15 PM Jralph, presentando un mescla di fusion Caribense, Afro y sonidonan Latino Productor: Jralph
Riba diasabra 21 di juni, e stage ta continua cu:
• 7:15 PM Jeanior Goeloe, presentando musica Urban nobo cu un toke local Productor: Rygel Isabella
• 8:15 PM Lightskin Rasta, cu club Caribense y ritmonan Urban Productor: Fellow
• 9:15 PM Ataniro, sirbiendo sonidonan di club Urban Caribense Productor: Fellow
• 10:15 PM Suhcy ft. Casper, representando Love & Soca Productor: Nigel Hoek
Revitalisando espacionan, fortificando comunidad
Centro di Bario Noord a wordo scogi como e luga pa e prome evento aki como parti di e mision mas amplio di CEDE ARUBA pa revitalisa centronan di bario. E espacionan comunitario aki ta wordo reimagina como hubnan activo pa creatividad, expresion y conexion social.
Cu e partnership nobo cu ATA, VIBRACION CULTURAL lo bira un evento regular cu ta honra cultura mientras ta construi brugnan entre localnan, turistanan, talentonan, iniciativanan y luganan.
Informacion di Evento
• Entrada Gratis (portanan ta habri 6:30 PM)
• Luga: Centro di Bario Noord
• Fecha: 20 & 21 di Juni, 2025 | 7:00 PM – 11:00 PM
• Musica en bibo • Cuminda local • Mercado artesanal • Great vibes
Bini celebra e lansamento di VIBRACION CULTURAL y disfruta di dos anochi inolvidabel di musica, conexion y comunidad.
Pa preguntanan di media of entrevista: info@cedearuba.org | +297 582 7666