PoliticaFeaturedLocal

WEB y LNG tin historia ya caba den e gobierno di AVP pero no a logra : Ta un gobierno drechi y honesto ta logra esaki den tur transparencia

Minpres Parlamentojpg 1

Durante e reunion publico dialuna 13 di december pa trata pa trata e tema di Eagle LNG y WEB, Prome Minister Evelyn Wever-Croes a indica cu WEB ya caba tabata tin un historia pa loke ta trata LNG hunto cu e gobierno anterior di AVP. Partido AVP durante su gobernacion, a forsa WEB pa firma un MOU cu GasUnie pa bay over na LNG. Esaki pa un periodo di mas di 20 aña. Esaki, Prome Minister a expresa ta loke ta wordo yama hipocresia den politica.

 

Prome Minister a enfatisa durante e 8 añanan cu e tawata den Parlamento, partido AVP nunca a trece contractnan aki na Parlamento. E unico contract cu AVP a trece Parlamento tabata e contract di Citgo cu garantianan cu Gabinete Eman a tuma riba su lomba. Esaki tawata firma caba pero door cu nan mester a pasa e ley, nan a bin Parlamento cu ne.

 

Contrario na Minister Glenbert Croes cu a duna tur hende copia, e Gobierno di AVP a pone e documentonan disponibel den e sala di biblioteca den Parlamento. Nan a pone dos hende sinta, dos bodyguard anto Parlamentarionan, un pa un por a bay eyden bay blader den e contract bou vigilancia. Esey tabata Gabinete Eman, cartel di corupcion. “Ta bon pa Parlamentarionan nobo scucha esaki especial esunnan di oposicion, pa nan sa cu ken nan ta cokotia eybanda”, Prome Minister a bisa.

 

Tambe ta importante pa subraya cu ora ta trata e contract entre WEB y Eagle LNG, e negociacionnan a tuma luga hunto cu e ex directornan di WEB tambe. E non-disclosure agreement (NDA) cu a wordo firma tabata cu e ex directornan di WEB.

 

Prome Minister a menciona e acuerdo cu AVP a firma cu GasUnie na unda por wak ken a firma pa mara Aruba pa mas di 20 aña. Esaki tampoco a yega Parlamento. E contract cu Citgo a yega Parlamento despues di varios siman cu el a wordo firma y solamente pasobra Land Aruba ta participe na dje.

 

Prome Minsiter a indica cu e huristanan den e fraccion di AVP y den oposicion mester por sa cu ora Land Aruba ta participe, Parlamento mester haye pa controla Gobierno den dje. Pero tur otro contract cu Land Aruba no ta participe na dje, cu ta entre partidonan cu tin non-disclosure agreement, clausulanan confidencial den dje, Gobierno no por duna nan zomaar. “Mike Eman sa esaki hopi bon pasobra nunca el a trece nan Parlamento y awor Partido AVP y Mike Eman kier hunga martir y cu un yoradera sabiendo kico por y kico no”.

 

Prome Minister a duna di conoce cu Minister Glenbert Croes a duna Parlamento tur loke e por a duna caba y ta buscando mas pa duna den tur transparencia. Esey, Prome Minister a enfatsa, ta e manera cu Minister Glenbert Croes ta traha, contrario na e gabinete di AVP cu no tabata conoce e palabra transparencia, y e unico cos cu nan kier a wanta ta e cartel di corupcion cu nan tabata tin den energia.

 

“Tocante GasUnie pa bay over na LNG, tur hende ta cuestiona dicon e partido AVP no por a cera e deal ey. AVP no por a logra pero un gobierno di hende drechi y honesto si ta logra. Por ta esaki ta e motibo cu AVP y Mike Eman ta haci jaloers awe. E motibo pa cua AVP no a logra ta pasobra loke GasUnie tabata kier, no tabata cumbini WEB na e momento ey. Gobierno di AVP e tempo ey tabata forsa WEB pero WEB no tabata kier pasobra nan a sinti cu e prijs di e acuerdo no tabata bon. Awor nan ta sinti cu e prijs ta na su luga y p’esey nan a bay di acuerdo”, Prome Minister a duna di conoce.

Related posts

Lo tin diferente stand proponi pa ta den henter oranjestad pa celebracion di 200 aña

EA News Author

Minister di salud publico a ricibi un recorido di e Proyecto Academic Building di Xavier University School of Medecine na Aruba

EA News Author

Minister di Cultura Xiomara Maduro: Dia 1 di juli 2023 ta conmemora 160 aña di abolicion di sclavitud door di Hulanda den e colonianan di Antias Hulandes y Surnam

EA News Author

Leave a Comment

Whatsapp Message