E barku Marinero Hulandes Zr.Ms. Friesland durante su último simannan a interseptá mas o ménos 1900 kilo di droga. E barku a sabi di obligá un asina yamá ‘go fast’ pa stòp. Esakinan tabata e di sinku, di seis i di shete kaptura di droga pa Friesland durante 2 luna di tempu. Ku kua e barku a interseptá en total 3880 kilo di droga.
E promé dos go-fastnan a keda deskubrí pa un avion patruyero di Repúblika Dominikana i Wardakosta Merikano. E di tres go-fast a keda deskubrí pa un avion patruyero Merikano, despues di kua Friesland a keda aktivá. Ku e barku rápido di intersepshon, FRISC, den kua tabatin un ekipo kombiná di tripulashon di e barku mes, Wardakosta Merikano i e Eskuadron di e Flota Hulandes di Marina, e botonan a keda pèrsiguí i kapturá. Durante e promé i di dos kaptura e pasaheronan di e go-fastnan a saka e droganan for di boto i tira esakinan den laman, na momento ku nan a mira e FRISC yegando.
Sakamentu di e bultonan di droga a bira un aktividat durante kua e tripulashon kompletu di Friesland a bin yuda, pa buska e paketenan i artíkulonan di e pasaheronan i marka esakinan.
Di tal forma e tripulantenan di e FRISC por a saka e paketenan for di den laman i huntu ku e demas paketenan esakinan a keda konfiská. E pasaheronan i kontrabanda di e promé dos go-fastnan mas despues a keda entregá na Wardakosta Merikano, esnan di e di terser go-fast na e barku Marinero Merikano Billings, pa despues persiguishon sigui na Estádos Unídos di Merka.
Desde Yanüari 2022 Zr.Ms. Friesland ta aktivo den region. Ehekushon di operashonnan anti-droga den esaki ta keda kombiná ku sosten na Wardakosta Region Karibe. Durante e último periodo di patruyahe un total di 7 intersepshon a tuma lugá, durante kua un total di 3880 kg di kontrabanda a keda interseptá i 21 pasahero a keda detené.