ORANJESTAD,Aruba
Den nomber di fraccion di AVP e lider di fraccion, sr Marlon Sneek a dirigi palabranan di pabien pa directiva di SKOA cu e bunita exposicion presenta caminda scolnan di SKOA a bin hunto y a presenta tur locual e scolnan aki tin pa brinda na comunidad.
Na e ocasion aki, sr Sneek a mustra cu a haya diferente reaccion di mayornan cu a acudi na e exposicion aki, caminda a mustra nan preocupacionnan pa desaroyonan cu tin den mundo di enseñansa riba varios punto.
“Entre otro nos por a scucha observacionnan riba futuro di Scol Frere Bonifacio caminda a benta e edificio abou pero cu te dia di awe ningun hende sa kico ta futuro di e scol aki y riba esaki fraccion di AVP tin pregunta pa e Minister di Enseñansa.
Entre otro tin un Imeldakleuterschool cu a wordo muda pero awor a cuminsa haci e scol bek limpi ya cu nan ta muda bay bek den e edificio aki pero ya cu e proceso aki tambe a para y nos no sa kico ta e motibo tras di esaki y riba esaki tambe nos a haci pregunta.
Sinembargo un punto cu sigur ta mustra un tendencia serio di e gobierno actual y cu nos ta lamenta grandemente, ta e hecho cu Prome Minister di Aruba, ta haci un suplica den medionan di comunicacion, pidiendo comercio pa yuda den reconstruccion di scol di Cacique Macuarima, cu recientemente a sufri daño serio ora algun hoben baldadi, a cende algun local na candela.
E peticion di Prome Minister Evelyn Wever Croes a pone mi persona corda di biaha tempo cu e hoos a pasa den bario di Noord, causando daño grandi na St Annaschool, causando un impacto grandi riba henter comunidad pa e destruccion cu a keda atras.
Gobierno di Mike Eman e tempo ey, a asumi su responsabilidad y a pone un suma di 5.2 miyon florin disponibel pa renoba, restaura y amplia henter e scol aki.
Awe pueblo por mira un Prome Minister ta coy placa for di e ‘maatschappelijke bijdrage’ cual ta e fondo crea ora cu un compania haya un tereno comercial pa traha un proyecto, mester haci un donacion di tres pro-mil di e suma cu e proyecto lo costa, esaki ta duna como maatschappelijke bijdrage cu ta bay na un causa social, pa yuda comunidad.
Sinembargo awor cu ta spera cu e Prome Minister aki haci lo corecto, e ta bira pidi sector comercial ta yuda den reconstruccion di scol di Macuarima, mientras cu e mesun Evelyn aki ora cu el a tuma e cartera aki bou su maneho, a otorga un suma di 2 miyon florin pa e edificio di Futura, caminda tin henter famia aden, prima, ruman, tio, yiu di ruman, yiu di primo, swa, ruman di casa, tur ta eyden y pa nan si Evelyn tabatin e suma di 2 miyon pa duna.
Awe un Macuarima School cu ta un scol cu ta garantisa pa nos hobennan haya un bon educacion, ta den un situacion asina serio y Evelyn como Prome Minister ta sali bisa cu e ta spera pa comercio yuda e scol aki pero kico abo como gobierno ta bay haci?
Kico abo Evelyn ta bay haci, ya cu tin placa den e fondo di maatschappelijke bijdrage y di con no ta bisa cu ta pone un of dos miyon florin disponibel pa Macuarimaschool pa por renoba e scol pa e muchanan por bin bek e scol mas pronto posibel?
No Evelyn awor ta bisa comercio cu e ta spera pa nan bin duna un man caminda ya caba nos a mira cu comercio a Sali duna un man ya cu esey ta nos hendenan cu semper ta duna un man pero e prome yama pa saca man y yuda den un caso asina serio, ta gobierno,” lider di fraccion di AVP, Marlon Sneek a declara.
Sr Sneek a sigui mustra cu esun prome yama pa carga su responsabilidad ta gobierno, ta Prome Minister y mescos cu pueblo a mira gabinete Mike Eman carga su responsabilidad den e caso di Sint Annaschool na Noord, caminda a pone 5.2 pa drecha e scol aki, pueblo ta spera mesun cos di Prome Minister Evelyn Wever Croes pa haci mescos for di prome dia caba pero no a mira esaki sosode.
Sinembargo por a mira si con a hinca 2 miyon den Futura, caminda hasta a huur un edificio den centro di Oranjestad di un sponsor di partido y ora cu bay mira kende ta Futura, por mira cu ta ‘friends & family’ ta hinca eyden, Parlamentario Marlon Sneek a conclui.