ORANJESTAD,Aruba
Parlamentario Alan Howell diamars durante tratamento di presupuesto 2020 a presenta 2 mocion na beneficio di nos hendenan, pero lamentablemente esakinan no a haya sosten di fraccionnan di MEP ni RED.
Un di e mocionnan tabata pa parlamentarionan y ministernan contribui cu 1,000 Florin pa luna for di nan salario durante un periodo di 3 luna cuminsando na luna di april, esaki lo a representa casi 100,000 Florin cu lo por a bay pa yuda hopi famia na Aruba den e temponan di crisis aki. E otro mocion tabata pa pidi gobierno papia cu FCCA pa flexibilisa nan maneho ora un huurdo di un cas social fayece y ta laga yiunan inscribi na e mesun adres atras. Pa nan por tin e prome opcion pa sigui huur e cas.
E mocionnan a haya un total di 8 voto na fabor (POR, parlamentario independiente Daphne Lejuez y AVP) y 9 voto contra (MEP y RED), di e forma aki a keda demostra ken tin pueblo y nos hendenan humilde na pecho y ken no.
Howell ta bisa cu a presenta mocionnan cu a sali for di curason y cu a wordo sosteni pa un total di 8 parlamentario cu a wak e importancia di nan mirando e situacion cu nos ta aden. “Ma kere cu e mocionnan lo a wordo aproba pasobra nos ta den un situacion grave unda cu nos tur mester ta solidario y para banda di pueblo. Mama y tatanan ta perdiendo nan trabou of ta bayendo hopi atras den nan entrada. Gobierno a pidi cooperacion di tur sector pa yuda den e temponan aki, pero te na e momentonan aki, esnan prome yama pa coopera, esta e representantenan di pueblo no a hacie. Fraccion di POR ta considera cu ta nos ta e prome yama pa duna ehempel, pa mustra cu nos ta solidario y cu nos tambe por duna di nos banda”.
Riba e punto di Fraccion di MEP cu 1,000 Florin ta tiki y cu nan ta dispuesto pa duna mas (aunke nan no a presenta ningun mocion), Howell ta bisa cu e echo no ta cu 1,000 Florin ta tiki, e echo ta pa contribui cu esnan cu a ponenan de Parlamento den momentonan di crisis. Si despues bin un cambio y ta bay duna mas, sigur cu Fraccion di POR lo sostene esaki, pero e cambio ey mester bin mas pronto cu ta posibel, pasobra esnan cu no tin entrada na e momentonan aki no tin e luho di warda ora Fraccion di MEP considera cu ta bon. Di otro banda, ora a bin dilanti cu e punto cu lo bay entrega vakantieuitkering y/of otro medidanan, esey no ta un sacrificio solamente pa parlamentario y ministernan, e ta un medida cu lo conta pa tur trahador den sector publico. “Esey no ta demostra e solidaridad di representantenan di pueblo pa cu esnan cu a ponenan eynan cu un salario promedio di 10,000 Florin pa luna. Ningun hende a studia pa bira parlamentario of minister. Ta pueblo a ponebo eynan y dunabo e salario. Den temponan di crisis cu nos ta bibando aden, unda cu pueblo mester mas dibo, bo no por duna 3,000 Florin? Ta hopi tristo esey ta.”, Alan a declara.
El a mustra tambe cu el a lanta den un famia humilde. Su tata a sine norma, balor y tres principio importante: Haci semper loke ta bon; Semper haci bo best y Semper mustra hende cu bo ta ‘care’. “Ami a haci loke mi mester a haci como representante di pueblo. Mi colega Dellanire Maduro tambe a demostra esey, igual cu parlamentario Daphne Lejuez y Fraccion di AVP”.
Finalisando, Alan Howell a bisa cu su consenshi ta limpi, cu el a para y lo sigui para pa pueblo y specialmente esnan cu mas tin mester y awo ta pueblo ta esun cu mester bay husga loke a pasa diamars 24 di maart 2020 den sala di Parlamento ora dos mocion na fabor di pueblo a keda desaproba pa dos partido den coalicion: esun di mas grandi y esun di mas chikito.
