ORANJESTAD, Aruba
Marisol Lopez Tromp ta bringa alma y cuerpo pa keda como minister y no ta compronde of no kier compronde cu confiansa ta tur cos pa por traha hunto den un gobierno di coalicion y ta parti di un Partido.
A manda Minister Marisol Lopez Tromp un carta prome y a duna un ultimatum te cu dialuna , pero e mandatario den un forma arogante a yama un conferencia di prensa na pia di Hooiberg pa mustra cu lo e keda eherce como minister. Indirectamente bisa cu e carta di su Partido p’e no tin balor. Asina mes a sigui como minister pero e maldad tabata bisto den e mandatario unda cu poco poco y cu hopi strategia y cu cara di lamchi a traha contra di e vision di plan di gobernacion di gobierno di coalicion mirando con el a maneha Serlimar y tambe trapa riba decisionnan y leynan riba piscador. Esaki pues tabata e ultimo punto cu a bin dilanti.
Banda di tur esaki informacion interno di hende y di di departamentonan cu ta cay bao di e mandatario, e mesun mandatario ta saca informacion y duna medionan comprometi di e mandatario pa por insinua situacionnan cu no ta cuadra cu realidad entre otro cu supuesto ministernan di MEP lo a ricibi tereno y lo mester a bende esaki cu comerciante, cual no tin prueba di esaki. E mandatario den un entrevista ta bisa cu e no a haya e oportunidad di expresa su mes cu su coleganan mirando e decision cu nan a tuma pa kita su cartera for di dje den un reunion. Esaki ta un otro mentira di minister Marisol lopez Tromp. E mandatario a ricibi carta y a wordo yama na varios ocasion pa reuni cu su coleganan pero nunca ta atende na esaki. Minister Marisol Lopez Tromp den pasado tambe a vota contra di ex minister di infrastructura Benny Sevinger y a vota pro e mocion di desconfiansa. Ironia di bida awe Minister Marisol Lopez Tromp tin e mesun cartera y tampoco ta carga e confiansa di su Partido y tampoco di e gobierno cu e ta forma parti di dje. Segun e mandatario, e no ta un minister corupto, e no ta bao di investigacion , pero sinembargo pueblo ta mira e situacion diferente. Minister Marisol Lopez Tromp ta haci comosifuera cu e situacion di desconfiansa ta trata di awe, cu e situacion cu e no ta contesta parlamentarionan preguntanan y ta haci manera nan no ta existi y ta traha riba su mes no ta situacion di awor. Esaki ta situacionnan di desde e mandatario a sinta riba e stoel como minister y no ta contesta parlamento nada. Esaki no ta e sistema normalmente cu ta anda y trata cu coleganan den gobierno y den parlamento.
Den historia politico nunca un parlamento a baha un minister. Sinembargo esaki no ta significa cu e no por pasa mirando cu ningun minister y ningun parlamentario, mas bien ningun Partido politico por traha cu Minister Marisol Lopez Tromp. Historia a mustra esaki tambe den e cada Partido cu Marisol Lopez Tromp a pasa den dje. Kico ta e mensahe cu minister Marisol Lopez Tromp ta hiba como persona di no por traha cu ningun Partido, esaki ta bisa hopi di dje mes como persona. Den varios entrevista e ta menciona cu e no a haya tempo pa papia cu Partido, pero di otro banda Partido ta menciona cu practicamente ta roga minister Marisol Lopez Tromp pa ta presente den reunionnan. Y lamentablemente nunca el a acudi.