Ta sigui enfoca riba nos playanan, nos hendenan y hospitalidad como tambe siguridad:
Como parti di A.T.A. su tarea di mercadea y maneha Aruba como destino turistico, tin diferente proyecto cu A.T.A. ta inverti aden. Ta trata aki di proyectonan tanto di mehoracion di producto como tambe proyectonan di desaroyo di producto. E proyectonan aki ta alinea cu e maneho nacional di turismo. Asina por bisa cu 90% di e gastonan di A.T.A. ta bay na mercadeo y di esaki entre 5% y 10% ta bay na nos producto turistico y e restante ta bay na mercadeo internacional.
Tin 3 area principal cu ta enfoca riba dje como parti di e proyectonan aki, cu ta nos playanan, nos hendenan y hospitalidad y tambe siguridad. Ta duna atencion na otro aspectonan manera proteccion di naturalesa, cultura y inovacion. Pero e 3 area principal ta forma e fundeshi di Aruba su turismo.
Nos playanan
Un di e proyectonan cu ta tumando luga na e momento aki ta e renovabacion y embeyecimento di e plataforma y toren na Palm Beach. Esaki no ta un proyecto isola mirando cu ta inverti den proyectonan den e area ya pa varios aña. Por pensa por ehempel riba e estudio cu a wordo haci pa midi calidad di awa na Palm Beach, como tambe a pone buoys pa asina marca e area designa pa landa. Na 2023 lo sigui cu e proyecto di buoys tambe pa di e forma aki marca e buffer zone pa trafico motorisa riba awa.
Nos Hendenan y Hospitalidad
Lo sigui enfoca den preparacion y conocemento di nos hendenan, a traves di entre otro e Aruba Certification Program, e Aruba Quality Seal como tambe e Aruba Signature Experience. E proyectonan aki ta beneficioso pa nos industria turistico, pero tambe pa nos isla en general ya cu ta yuda pa mehora experiencia di nos bishitantenan y esaki sigur ta eleva e satisfaccion cu nos destino.
Siguridad
Otro aspecto sumamente importante cu ta inverti aden ta siguridad. Aruba ta conoci pa ta un di e destinonan di mas sigur den caribe y esaki ta un di e top tres motibonan cu un turista ta bishita Aruba. E siguridad aki ta importante pa turismo pero tambe pa e calidad di bida di nos comunidad pues ta sigui enfoca riba e area aki den 2023 tambe.
Aki mester bisa cu for di 2011 cu A.T.A. a bira Sui Generis, ta aporta na Aruba Hospitality and Security Foundation. Den e fundacion aki tin miembro di A.T.A., KPA, AHATA, ATIA y algun profesional den area di siguridad den sector hotelero. Pa medio di e fundacion aki ta enfoca riba siguridad den zona turistico; a inverti den ekipo pa polis, incluyendo pa Strandpolitie, entrenamento regular, accesoria di un organisacion di siguridad internacional y mas. Pa 2023 A aloca fondo pa reintroduci un “Visibility Team” pa asina percura pa mas seguridad, visibilidad y presencia di miembronan di siguridad den area turistico.
Cada un di e proyectonan cu A.T.A. ta financia ta importante ya cu ta contribui na eleva e producto turistico cu na e momento aki ta nos pilar economico principal y loke nos tur ta biba di dje.
