Segun tradicion, un delegacion di directiva di Fundashon Alzheimer Bonaire, a haci un bishita di cortesia cerca diputado di Salubridad Publico, Sr. James Kroon riba Dia Mundial di Alzheimer, diahuebs 21 di september, pa entreg’é rapport World Alzheimer Report 2023 “ Reducing dementia risk: never too early, never too late “, cu a publica e dia ey i tambe a entrega Relato Anual 2022 di Fundacion Alzheimer Bonaire.
Presidente di FAB mesora a haci uzo di e oportunidad, mirando ku diputado pa prome biaha ta responsabel pa e cartera aki, pa pone na altura di fundacion su meta i actividadnan cu directiva a organisa durante Luna Mundial di Alzheimer, pero specialmente pa pone algun asunto cu ta canando na atencion di diputado.
Diputado a expresa su aprecio pa e trabou i metanan di e fundacion i tabata tambe impresiona pa e actividadnan riba programa di Luna Mundial di Alzheimer i a desea directiva, su boluntarionan tur cos bon pa futuro i cu directiva por conta cu su sosten i cu esun di gobierno di Boneiro. Consehero di portafolio Sra. Gisette Emer tambe tabata presente durante e combersacion i pa directiva di Fundacion Alzheimer Bonaire presidente Sr. Evert L. Piar, visepresidente Sra Henna Winklaar, sekretario Sra. Merry Ottenhof-Coffie i di dos secretario Sra. Gerladine Dammers. Tabata un combersacion cortico, pero fructifero i na satisfaccion di tur.