Gustosamente Kolegio Ehekutivo di Boneiru ke duna informashon klarito tokante informenan resien ku a okashoná sierto konfushon tokante un supuesto paro di konstrukshon na nos isla. No tin kestion di un paro di konstrukshon. E sektor di konstrukshon ta keda aktivo. Loke sí a kambia ta ku ta evaluá petishonnan pa pèrmit den un forma mas kuidadoso pa loke ta trata kalidat i kumplimentu ku legislashon i regulashon.
Den e promé kuartal di aña 2025 e kantidat di pèrmit di konstrukshon ku a otorgá ta komparabel ku e mesun periodo na aña 2024. Na mes momentu e balor total di konstrukshon di e proyektonan akí a subi ku mas òf ménos 37% te 44,8 mion USD. Esaki ta un indikashon di un oumento di proyektonan grandi di bien inmóbil, entre otro desaroyo di área ku ta kuadra dentro di e ambishonnan teritorial di Boneiru.
Demanda pa trahadó kualifiká ta oumentando drástikamente
Un otro desaroyo remarkabel ta ku e kantidat di petishon pa pèrmit di trabou pa trahadó kualifiká, manera mètslá, karpinté i fèrfdó, for di aña 2020 a bira kasi dòbel. E oumento akí ta mustra ku e sektor di konstrukshon ta proveé sufisiente trabou, pero tambe ku e merkado laboral lokal tin problema pa proveé den e demanda kresiente akí.
Kiko nos por dedusí a base di esaki?
E sektor di konstrukshon ta ofresé hopi empleo;
Tin un skarsedat struktural di trahadó kualifiká ku ta disponibel;
Boneiru ta ekonómikamente atraktivo pa forsa laboral for di eksterior;
E demanda pa bibienda i infrastruktura ta keda haltu.
E desaroyo akí ta suprayá importansia di un kresementu balansá, kaminda desaroyo ekonómiko ta kana man den man ku fortifikashon di kapasidat lokal.
Rapòrt di ILT 2023: defisiensia serio den e sistema di dunamentu di pèrmit, supervishon i mantenshon di lei (VTH)
E adaptashonnan den e aserkamentu di dunamentu di pèrmit i mantenshon di lei ta un reakshon riba e rapòrt di Inspekshon di Biba i Transporte (ILT) di yüni 2023. Den e rapòrt akí nan ta husga Boneiru komo insufisiente. E defisiensianan mas importante tabata entre otro:
Regulashon ku a bira bieu (parsialmente ainda for di aña 1961);
Proseduranan di evaluashon i kompilashon di fail ta defisiente;
Falta struktural di personal pa mantenshon di lei i dunamentu di pèrmit;
Retraso den tratamentu di petishon.
Aunke e mehorashonnan nesesario akí posibelmente a krea un impreshon ku ta tarda mas tantu pa duna pèrmit, lo kontrali ta bèrdat: awor akí e komishon di konstrukshon ta prosesá un promedio di 15 pa 30 fail pa siman, kompará ku 3 te 10 anteriormente. Kalidat i durashon di e proseso a mehorá pues.
Reformashon i modernisashon ta den pleno marcha
Kolegio Ehekutivo a pone pasonan konkreto pa fortifiká e sistema di dunamentu di pèrmit, supervishon i mantenshon di lei:
Evaluashon di petishonnan nobo ta tuma lugá den un forma mas kuidadoso;
Supervishon di mantenshon di lei a keda fortifiká;
Redukshon di retraso;
Aktualisashon di legislashon i regulashon.
Dia 27 di mei 2025 Konseho Insular a bai unánimamente di akuerdo ku un plan pa modernisá e regulashon di konstrukshon i naturalesa ku a bira bieu. Ta sinkronisá esaki ku e Lei di Bibienda, Desaroyo Teritorial i Medio Ambiente (VROM) BES i e Dekreto di Konstrukshon BES, i ku esaki ta establesé un kuadro di desaroyo pa Boneiru ku ta resiliente pa futuro i sostenibel.
Ekilibrio entre kresementu i habitabilidat
Kolegio Ehekutivo ta skohe konsientemente pa un rumbo den kua desaroyo ekonómiko no ta bai a kosto di Boneiru su ambiente di biba úniko. E puntonan di lansa ta:
Akselerá kaminda ta posibel, kuidadoso kaminda ta nesesario;
Ménos burokrasia, mas transparensia;
Regulashon moderno ku ta konektá ku nos isla;
Protekshon di naturalesa, kultura i koherensia sosial;
Promoshon di empleo sostenibel, inkluso invershon den kapasitashon profeshonal lokal.
Di e manera akí Boneiru ta edifiká un futuro kaminda kalidat, sostenibilidat i habitabilidat ta para sentral.