Un biaha mas Boneiru a pone un paso importante den fortifikashon di enseñansa di idioma i oportunidat pa sigui enseñansa na nos isla. Dia 7 di yüli 2025 Entidat Públiko Boneiru i tur skol básiko supsidiá na nos isla a firma un deklarashon di intenshon konhunto pa traha huntu riba desaroyo di un método pa Hulandes komo idioma strañero. E firmamentu a koinsidí ku un bishita spesial di dos investigadó ku resientemente a optené nan título di dòktor, Gil-Marie Mercelina i Melissa van der Elst-Koeiman, ku a entregá nan tésis na diputado Nina den Heyer.
Kolaborashon pa enseñansa efektivo di idioma
E deklarashon di intenshon ku nan a firma ta un inisiativa di Entidat Públiko Boneiru den kolaborashon ku kuater direktiva di skol na Boneiru.
Stichting Birgen Maria Onderwijs
Stichting Openbaar Onderwijs Bonaire
Stichting Leren is Leuk
Stichting Ieder Kind een Talent.
E partidonan akí ta uni forsa pa yega na un método pa Hulandes komo idioma strañero ku ta adekuá i duradero. Ku esaki nan ke konektá mihó ku e realidat di idioma di alumnonan boneriano, pa ken hopi biaha hulandes no ta nan idioma materno.
Puntonan importante di salida di e kolaborashon ta:
desaroyá i salbaguardiá un método pa Hulandes komo Idioma strañero ku ta kuadra ku e ophetivonan núkleo aktualisá pa Boneiru (den kolaborashon ku sentro di ekspertisio SLO);
envolvimentu di maestronan, direktivanan di skol, ekspertonan di idioma i otro stakeholdernan;
uso efisiente di e 2.500.000 euro ku a primintí for di e Agènda di Akshon di Pasado di Sklabitut.
E kolaborashon ta suprayá e aspirashon konhunto pa yega na oportunidat igual pa enseñansa pa tur mucha na Boneiru.
Kontribushon sientífiko na enseñansa multilingwe
Na ofisina prinsipal di gobernashon Gil-Marie Mercelina i Melissa van der Elst-Koeiman a entregá nan tésis ku resientemente nan a defendé na diputado Den Heyer. Ámbos sientífiko a hasi nan investigashon dentro di e proyekto di e Organisashon Hulandes pa Investigashon Sientífiko (NWO): ‘Bilingwismo, alfabetisashon i éksito den enseñansa na Hulanda Karibense’, den kolaborashon ku Radboud Universiteit Nijmegen i University of Curacao.
Gil-Marie Mercelina a enfoká riba desaroyo di lesamentu serka mucha di grupo 2, 3 i 4 i el a doktorá dia 8 di yanüari 2025.
Melissa van der Elst-Koeiman a investigá alumnonan di grupo 6, 7 i 8 i el a doktorá dia 12 di yüni 2024.
Bou di guia di prof. dr. Eliane Segers, prof. dr. Ludo Verhoeven i prof. dr. Ronald Severing nan a duna un aporte sientífiko na e konosementu tokante enseñansa multilingwe efektivo den region karibense.
Diputado den Heyer a ekspresá su apresio: ‘Awe nos ta konstruyendo dos brùg akinan: un entre siensia i práktika di enseñansa, i un entre maneho i e ambiente diario di nos alumnonan. Boneiru ta demostrá ku invershon den idioma materno, multilingwismo i oportunidat igual no ta un promesa, pero un tarea konhunto.’
