Direktorado di Supervishon i Mantenshon di Lei di Entidat Públiko Boneiru a organisá un anochi di informashon pa doñonan di garashi tokante atendé ku karkachi di outo. Binti empresario a partisipá na e enkuentro.
Durante e anochi nan a splika kiko lei ta indiká komo un karkachi di outo i kua ta e reglanan ku ta vigente pa esaki. Nan a papia entre otro tokante e stipulashonnan den e Ordenansa General di Polis (Algemene Politiekeur – APK) i e Dekreto di Establesimentu i Aktividat BES (Inrichtingen- en Activiteitenbesluit BES – IAB BES). Por ehèmpel no ta pèrmití pa pone karkachi di outo riba tereno di gobièrnu i ta pèrmití trabou di garashi tuma lugá únikamente na e sitionan destiná pa esaki.
Banda di e kuadronan hurídiko, e doñonan di garashi ku tabata presente a haña informashon práktiko tambe tokante nan ròl i responsabilidat na momentu di mantené nan alrededor limpi, ordená i habitabel. Tabatin espasio pa pregunta, interkambio di eksperensia i deliberashon tokante desafionan konhunto.
E reakshonnan tabata positivo: e empresarionan a bisa ku nan ta apresiá e inisiativa di gobièrnu i nan a pone énfasis riba importansia di kolaborashon.
‘Doñonan di garashi ta hunga un ròl klave den atendé ku karkachi di outo. Huntu nos ta traha pa logra un solushon struktural i sostenibel, di manera ku nos barionan ta keda limpi, seif i habitabel,’ segun Direktorado di Supervishon i Mantenshon di Lei.
Ku e anochi di informashon akí a pone un promé paso den direkshon di un aserkamentu konhunto i duradero di e problemátika. Direktora di Supervishon i Mantenshon di Lei ta wak bèk ku satisfakshon i ta suprayá ku kolaborashon ku empresarionan lokal ta esensial pa sigui fortifiká kalidat di bida i siguridat na Boneiru.