Kiebro den vehíkulo na sitio di sambuyá
Djaweps 13 di novèmber a drenta keho di ladronisia for di un pikòp ku tabata stashoná na e sitio di sambuyá ‘Weber’s Joy, situá na Kaminda Turístiko. Mientras e okupantenan di e vehíkulo tabata sambuyá, deskonosínan a bai ku entre otro un tas, yabinan, un brel di solo, sèrbètè i paña.
Djaweps 13 di novèmber a drenta keho di ladronisia for di un outo ku tabata stashoná entre e sitio di sambuyá ‘Invisibles (51)’ i ‘Maui Beach’ situá na E.E.G. Bulevar. Mientras e okupantenan di e vehíkulo tabata snòrkel, deskonosínan a bai ku dos telefòn selular, un tarheta di banko i sèn kèsh.
Ta investigando e kasonan.
Detenshonnan pa manehá bou di influensia di alkohòl
Den e dianan ku a pasa, polis a detené dos shofùr pa manehá bou di influensia di alkohòl. A hasi un tèst di supla ku ámbos ku resultado positivo.
Djaweps 13 di novèmber, alrededor di 4 or di atardi, ‘meldkamer’ sentral a risibí notifikashon tokante un aksidente na Kaya Nikiboko Sùit, di kua un vèn a bai dal den muraya di un kas, pero despues a kore bai. Despues di mas investigashon a logra haña identidat di doño di e vèn, i a pidi e shofùr pa presentá na e sitio. Kòrtiku despues el a yega i a indiká ku el a konsumí alkohòl i p’esei el a bandoná e sitio. A hasi un tèst di supla kuné ku resultado positivo, di kua a detené e hòmber di inisial C.D.L. di 22 aña di edat. Despues di mas investigashon a resultá ku e sospechoso no tabatin reibeweis i lo haña but pa esaki.
Djaweps 13 di novèmber, alrededor di 1.45 or di mardugá, a detené un homber di inisial W.S.R.R. di 43 aña di edat na Kaya Industria. E sospechoso tabata manehá su vehíkulo sin lus sendé i tabata zeilu riba kaminda di kua polis a dun’é señal pa para. E shofùr no a duna oido na e señal pa para. Despues di algun intento, polis a logra para e vehíkulo. Durante kontrol a resultá ku e shofur tabata mustra karakterístikanan di un persona ku ta bou di influensia di alkohol. A hasi un tèst di supla kuné ku resultado positivo di kua a detené. Despues di mas investigashon a resultá ku e sospechoso no tabatin reibeweis i a haña but pa esaki.
Detenshon pa kiebro den negoshi
Djárason 12 di novèmber, alrededor di 10.20 or di anochi, ‘meldkamer’ sentral a risibí notifikashon tokante kiebro den un establesimentu situá na Kaya General Manuel Piar. Na yegada di polis na e sitio a bin topa ku un sospechoso den akshon i mesora a pasa pa detenshon. A detené e hòmber di inisial H.F.W. di 30 aña di edat pa kiebro den negoshi.
Persona ku a bai snòrkel a fayesé
Djárason 12 di novèmber, alrededor di 11.45 or di mainta, ‘meldkamer’ sentral a risibí notifikashon tokante un persona ku a bai snòrkel ku a haña problema den laman na un bich situá na E.E.G. Bulevar, na altura di e waf di salu. Na yegada di polis i ambulans, ya a trese e persona na kosta i presentenan tabata bezig ku reanimashon. Personal di ambulans mesora a tuma e reanimashon over i a sigui ku e intentonan di reanimá e persona, pero lamentablemente en bano. E fayesido ta un hòmber di 58 aña di edat, di inisial M.J.J.V., nasé dia 11 di ougùstùs 1967, na Hulanda.
Kiebro den negoshi di buseo
Djárason 12 di novèmber a drenta keho di kiebro den un negoshi di buseo na un akomodashon turístiko situá na Kaya Internashonal. Deskonosínan a drenta e edifisio i a listra den esaki. Durante ku nan a drenta, a bai ku un klùis ku tabatin sèn kèsh komo kontenido. Ta investigando e kaso.