Durante e encuentro publico di dia 19 di maart 2026, den presencia di Sindicatonan
den union mi a enfatisa e necesidad pa nos laga nos bos resona na defensa firme
pa e dignidad di nos pais.
Mi a pone enfasis cu e momento pa traduci palabranan bunita den accion concreto a
yega: Aruba mester rechasa e Rijkswet HOFA pa proteha e autonomia cu nos
grandinan a lucha p’e. Mi a enfatisa y subraya cu mi tabata contra di CHE, COHO,
RAFT y awor mi ta contra HOFA.
E posicion aki ta basa riba e realidad cu Aruba a demostra caba di tin e capacidad y
e boluntad politico pa maneha su propio finansas y actualmente ta cumpliendo cu
normanan ancra den nos ley local cu ta funcionando efectivamente.
E Responsabilidad di e Generacion Actual
Nos ta den e aña cu Aruba ta bisti di gala pa celebra 50 aña di nos Himno y Bandera
y 40 aña di nos Status Aparte, y pesey mi a haci un yamada na e consenshi di mi
coleganan parlamentario. Mi a urgi pa no laga nos ta e generacion cu ta entrega
loke nos grandinan a lucha asina duro p’e, pasobra e libertad di Aruba no tabata un
regalo, sino un resultado di e curashi di homber y muhenan cu a kere den nos
capacidad pa goberna nos mes.
Realidad Financiero vs. Strategia di Miedo
Den e comunicado aki mi kier agrega cu mi ta rechasa categoricamente e uzo di
miedo pa forsa nos na firma e Rijkswet aki. Cifranan financiero stabiel y un
economia recuperando fuerte ta pruebanan bibo cu Aruba no mester entrega su
derecho di presupuesto, e curason di nos democracia, na un organo cu no tin cu
duna cuenta na e pueblo di Aruba.
Alabes mi kier a haci referencia na expertonan constitucional manera Elzinga y
Hoogers, cu ya a bati e alarma cu HOFA no ta un "check-up" temporal, sino un
peliger real pa un cambio di autoridad permanente, mescos cu a sosode caba na
nos islanan ruman Corsou y Sint Maarten.
Un Apelacion na Coalicion
Na final di mi disertacion mi a haci un apelacion na e coleganan di coalicion
representanto e partido mas grandi pa nan asumi responsabilidad y fiha un posicion.
Pasobra ta incompredibel cu un partido grabdi asina nos por tin un opinion riba un
asunto asina importante.
Pa termina mi kier bisa loke door di tempo, mi no a logra bisa den sala di
parlamento. Mi lo desea pa nos para hunto y duna Aruba e regalo di mas grandi
den e aña di fiesta aki: e confirmacion cu nos ta un pueblo digno, capas y liber. “Nos
no mester di e Rijkswet aki pa ta financieramente responsabel. Nos ta responsabel
pasobra nos tin amor pa nos pais. Aruba no mester di cadena, pasobra Nos Mes
Por!”