Dia 30 di maart 2026 a marca e prome aniversario di e coalicion AVP-FUTURO den gobernacion. Loke hopi tabata spera cu lo a bira un rendimento di cuenta transparente riba e logronan real pa Pais Aruba, a resulta den un escenario di manipulacion emocional y discursonan bashi di substancia.
Durante e conferencia di prensa den e ambiente natural di Parke Nacional Arikok, Prome Minister Mike Eman a opta pa un retorica yen di “mangel dushi”. En bes di presenta cifranan di progreso of proyectonan concreto cu a keda finalisa, e mandatario a dedica su tempo na elogia e personalidad di su ministernan, sin duna ningun indicacion structural di con nan maneho a beneficia e ciudadano Arubiano den e aña cu a pasa.
Restauracion of entrega di nos autonomia?
Un di e puntonan mas critico den e discurso di Prome Minister Eman tabata e mencion di un supuesto “restauracion” di e pais. Segun e mandatario, e rumbo actual ta loke pueblo a pidi dia 6 di december 2024. Sinembargo, tin un contraste grandi y doloroso: mientras e gobierno ta uza e imagen di un cas tipico den Parke Arikok pa hunga cu emocion di hende, e mesun gobernacion aki ta kibrando e “cas” di nos tur”nos autonomia”pa medio di e Rijkswet HOFA.
E entrega aki na Hulanda ta wordo presenta door di un cantidad di criticanan tur dia como e prueba mas grandi di incapacidad di e gobernacion aki pa maneha nos mesun finansas. E pregunta cu e ciudadano mester haci su mes ta: Dicon mester sacrifica nos identidad y autonomia bao di e capa di “cambio”Placa y “soñonan”? Un nacion no ta progresa ora e ta entrega su capacidad di dicidi riba su propio futuro.
Incapacidad financiero y debe den aumento
Tocante e area economico, e discursonan tabata igualmente vago. E elogio na e Minister di Finansas Geoffrey Wever a wordo bisti cu palabranan bunita manera “transmiti oportunidadnan,” pero e realidad tras di e fachada aki ta mustra un falta di vision pa maneha fondonan publico na fabor di Aruba mes. En bes di busca solucionnan autonomo, e vision ta parce limita na fia placa di Hulanda pa hinca e pais den mas debe pa proyectonan cu Aruba no tin mester na e momentonan aki.
E asina yama “di dos pilar economico” cu e gobierno ta promove, ta mustra mas bien riba un dependencia structural riba Den Haag, loke ta debilita nos posicion como pais den Reino y ta hinca nos den un buraco financiero mas hundo.
Un aña cu 0.0% di logro palpabel
E recorido cu Prome Minister a haci, elogiando individualmente e ministernan Geoffrey Wever, Wendrick Cecilia, Gerlien Croes, Mervin Wyatt-Ras, Rene Herde y Arthur Dowers, a faya den e parti mas esencial: e prueba di trabou. Un elogio personal no ta sustitui un informe di maneho oficial cu un vicion.
Na final di e prome aña aki, e impresion cu a keda atras ta un di un gobernacion cu ta biba den un mundo di “visionnan” sin enfoke y sin logronan palpable. Aruba a scucha hopi storia bunita dia 30 di maart, pero e pueblo ta keda warda riba accionnan cu berdad ta hiba e pais padilanti, sin compromete nos Status Aparte y sin sconde tras di emocionnan pa tapa e falta di resultado concreto.