Yhoelly Willems, yiu muhe di un di e victimanan cu a perde nan bida den e accidente fatal recien causa pa un chauffeur bou di influencia, a bin padilanti den un conferencia di prensa. Willems a reacciona firmemente riba declaracionnan recien di e mayornan di e hoben cu a ocasiona e tragedia, aclarando informacionnan cu, segun e, no ta cuadra cu e berdad y cu “no a cay den bon tera.”
Durante su intervencion, Willems a expresa e dolor profundo cu su famia ta biba aden y a lansa un apelacion fuerte na comunidad riba e iresponsabilidad di e chauffeur hoben. Ta trata di dos bida cu a keda ranca for di e mundo aki pa iresponsabilidad di un chauffeur bebi na stuur,” el a declara, pidiendo tur chauffeur pa busca un hende pa stuur si nan ta bebe.
Willems a duna un gradicimento special na un oficial di polis, kende el a identifica como e oficial Jonathan Orman, ken tabata presente na e sitio di e accidente. El a declara cu e oficial a actua debidamente y rapidamente pa percura pa tuma nota di e plachi di number, e color di auto, y tur detaye necesario pa captura e sospechoso prome cu e por a bandona e sitio. “Si no tabata pa e polis aki cu a actua asina lihe, e sospechoso aki lo a bay su cas y e caso lo no a bini dilanti,” Willems a splica.
Pa loke ta trata e parti legal, el a aclaria cu e caso awor ta bay via abogado. El a reacciona tambe riba declaracionnan di e otro banda publicamente, confirmando cu e sospechoso (Shanaya) tin mas cu un abogado den su defensa y cu caso a cuminsa caba pro forma dia 10 di april. Willems a duna di conoce cu e ta contento cu Ministerio Publico (OM) a saca un comunicado splica cu e sospechoso tin derecho riba representacion legal dentro di e marco di ley valido, pero a enfatisa cu OM si ta haciendo e investigacion corespondiente.
Trauma familiar y contesta riba e “trauma” di e sospechoso
Reaccionando riba declaracionnan di e mama di e sospechoso tocante e “trauma” di su yiu, Willems a comparti e realidad cu e mes tin cu enfrenta. El a splica cu e mester a mira su mama sin bida na e sitio di e accidente, un bista cu a laga un marca profundo den su bida.
ademas di esaki, Willems a devela detaye personal rond di e tragedia, compartiendo ta na estado na momento di e accidente. Lamentablemente, su mama nunca a haya e oportunidad di conoce su prome nieto, Aki no ta trata di ken tin mas trauma cu otro, mi punto ta cu e mester ta den kia (prizon). E la ocasiona un accidente fatal unda dos persona inocente a perde nan bida,” Willems a declara.
Al final, e yiu di e victima a retira su confiansa den husticia y a pidi pa e castigo wordo aplica debidamente conforme e leynan vigente pa e iresponsabilidad cu a kita bida di dos persona.