Presidente di e sindicato FTA, Hose “Jomar” Figaroa, a haci un yamada fuerte na Gobierno di Aruba pa structuralisa y aclaria su maneho di permiso prome cu cuminsa implementa sancionnan of boet na e dunadornan di trabou. Segun e lider sindical, e pais no por sigui permiti su mes pa actua unicamente den momento di crisis of na ultimo momento, pasobra e falta di planificacion preventivo aki ta esun cu a hiba Aruba na e problematica actual.
Maneho cla prome cu sancion
Den su declaracion Figaroa a splica cu prome cu e ehecuta por cana bay over na un fase di castigo of aplicacion di boet, e mester percura pa tin un cuadro legal y un maneho unifica, transparente, y “cla y raspa”.
Prome cu bo por bay over na bisa cu mi ta bay duna boet of mi ta bay pone cierto sancionnan, bo mester cuminsa na tin un maneho transparente di kico e ta cu bo tin cu cumpli cu ne, kico bo tin mester, y con bo ta bay filtra ken ta drenta y ken no ta drenta,” Figaroa a enfatisa.
E lider di FTA a recorda cu, formalmente, e pais a yega di tuma decisionnan den pasado, manera e amnistia general cu a wordo hancra pa legalisa un grupo basta grandi di persona. E personanan aki a firma pa nan mes y a ricibi un oportunidad pa wordo legalisa pa un aña, cu e condicion cu nan mester busca un dunado di trabou legal pa formalisa nan status ora e aña ey vence. Sinembargo, e fecha di vencemento di e prome grupo aki ta cuminsa legalmente den e lunanan di juli y augustus, locual ta lanta e pregunta con prepara Aruba ta pa maneha esnan cu no a logra haya e dunado di trabou ey.
Figaroa a duna un ehempel bibo di con e falta di vision a largo plaso ta afecta e propio aparato gubernamental, ilustrando cu ora a bin cu e maneho di permiso pa e grupo aki, no a mira e consecuencianan debidamente.
E a crea cierto bottleneck (congestion). Den e momento cu a bin e maneho, no a pensa debidamente kico e consecuencia ta bay ta. A pensa riba e departamentonan pa por duna e permiso, pero a lubida cu una bes e permiso ey bin, e persona tin cu bay Censo pa inscribi,” Figaroa a splica.
Como consecuencia di esaki, e departamentonan cu mester a duna permiso tabata supuestamente capacita, pero ora e masa di hende a yega Censo, a bin topa cu un congestion enorme pasobra e Censo no tabata prepara pa e fluho ey. “Esey ta un fayo di nos como pais, cu nos ta warda te na ultimo momento pa cuminsa regla un situacion,” el a agrega.
Locual mas ta preocupa e sindicato ta cu e necesidad di man di obra aki no ta un sorpresa pa e gobernantenan. Pa medio di estadistica, Gobierno tabata sa for di añanas pasa cu e expansion den sector di hotel y e construccion di camaranan extra tabata bay rekeri un cantidad masha grandi di trahado adicional. Di igual manera, e datonan di Censo ta mustra caba cu e poblacion di Aruba ta un poblacion cu ta envehesiendo , locual ta nifica cu den e proximo 10, 15 pa 20 añanan, un cantidad grandi di trahado local lo sali for di e mercado laboral.
Apesar cu tabatin e datonan aki disponibel pa mas di un decada, e sindicato ta lamenta cu a scoge pa warda te ora “e baca ta den hoga” pa e ora ey core busca un solucion pa importa hende. Figaroa a conclui cu su declaracion mustrando cu e decisionnan purá y sin base solido aki ta perhudica e pais, uzando e dicho popular Arubiano: “Sopi pura ta sali salo”.