Den un esfuerso pa percura cu e comunidad y e trahadonan di Aruba ta bon informa, un grupo di sindicato a bin hunto pa duna un seccion informativo urgente tocante e desaroyonan rond di e Rijkswet Financieel Toezicht (HOFA) y e Landsverordening (LWHO). E grupo sindical ta cuestiona e transparencia di Gobierno y ta enfatisa cu e decisionnan aki no ta simplemente asuntonan financiero, sino cu nan ta afecta e esencia mes di e autonomia di Aruba.E pueblo mester ta bon informa y no cu solamente e parti cu gobierno kier mira , pero tur dos banda di medaya.
Un yamando pa claridad y informacion transparente
Presidente di sindicato FTA Hose Figaroa , den e ultimo tempo hopi seccion a wordo duna na bestuur di sindicatonan pa asina nan por ta na altura di e contenido real di e documentonan aki. E preocupacion principal ta cu pueblo ta tende hopi di HOFA y LWHO, pero falta informacion concreto y neutral, un deber di gobierno cu e no ta cumpliendo cu ne.
Sinembargo sindicato nan no kier a haci esaki di un punto di salida politico,” e sindicatonan a splica, Aruba mester di informacion real y tin derecho di haya e informacion manera cu e situacion ta realmente, un responsabilidad cu e gobierno di Aruba no ta cumpli cu ne , pero ta sconde y ta dies informa den ceno scondi na comerciantenan so.
Segun Presidente di sindicato FTA aki ta enfoca riba vaststaande feiten, riba documentonan cu nos por habri y lesa manera cu nan ta.” E sindicatonan a duna di conoce cu nan no ta contra supervision financiero, basicamente parlamento tampoco y e pueblo tampoco, pero nan ta cuestiona e forma den cual e ta wordo hinca den un “bachi” di un Rijkswet, cual nan ta considera un atake contra e derecho di autodeterminacion di Aruba. Contra di e deseo di e pueblo di Aruba.
Autonomia vs. Supervision
Disciplina financiero di Aruba, mester wordo manteni bou di control local. Segun Presidente di sindicato FTA Hose Figaroa e hecho cu Hulanda ta mara interesnan fiansa mas abou na e exigencia di un Rijkswet, ta lanta preguntanan serio riba si e “consensus” aki ta basa riba libertad di decision of si e ta un medida forzoso.
E statuut ta bisa cu asuntonan financiero di un pais no ta un asunto di Reino, esey ta un asunto di e pais mes, e sindicatonan a remarca. Presidente di sindicato FTA ta subraya cu e construccion di un Rijkswet ta pone e yabi di e supervision financiero di Aruba den man di parlamentarionan na Hulanda, cu Aruba no tin un relacion di eleccion democratico. Ademas, nan ta adverti cu politica ta cambia, y un parlamento na Hulanda di aki 5 of 10 aña por tin pensamentonan hopi diferente riba e mesun ley aki.
Falta di dialogo cu Gobierno
Un punto di critico ta cu te dia di awe, Gobierno di Aruba no a cumpli cu su obligacion pa informa Parlamento y pueblo debidamente riba e rumbo cu nan a scoge. Gobierno ta scoge pa sinta solamente cu gremionan comercial, den e afan pa busca beneficionan financiero, pero ta descuida e aspectonan di principio y di gobernacion.
Gobierno no a acerca nos riba e tema di HOFA mas despues cu sindicato a presenta nan punto di bista den parlamento , Presidente di sindicato FTA Hose Figaroa ta indica cu “Nos ta tende praatjes na radio y den prensa, pero no tin un dialogo oficial.” Nan a subraya cu, for di momento cu consehonan di Raad van Advies y Raad van State a sali, a bira cla cu e preocupacionnan cu sindicatonan a bin ta vocifera for di cuminsamento no tabata “ko’i loco,” sino fundamente basa riba e realisacion cu e autonomia di e pais ta na peliger.
Mirando pa dilanti
Maske Gobierno no a tuma e iniciativa pa un dialogo nacional, e sindicatonan ta mantene e porta habri. Nan ta reitera cu nan ta semper cla pa sinta na mesa, basta cu e dialogo ta basa riba transparencia y informacion completo y e focus pa Aruba.
Dialogo ta sumamente importante pasobra e ta crea un miho draagvlak pa cualkier decision,” e sindicatonan a conclui. Nan meta ta pa den futuro, e pueblo di Aruba por tuma un decision balansa y bon informa, unda cu e supervision financiero ta keda manteni sin cu esaki mester bay a costo di e autonomia di e pais.
Presidente di sindicato FTA Hose Figaroa ta enfatisa cu nan lo continua cu nan labor di conscientisacion, enfocando riba hecho y no riba color politico, pa asina e trahado publico y no publico y e pueblo en general tin e informacion corecto y pa por forma nan mesun opinion riba e futuro constitucional di Aruba.
