Den un reunion publico cu a trece hopi discusion den parlamento, e maneho di fraccion di FUTURO y di Minister Geoffrey Wever a keda cuestiona duramente. Den e reunion publico nr. 17, cu a tuma luga dia 23 di juni ultimo, a trata e “Instalacion di un fondo presupuestario pa inversion”. Sinembargo, e forma con a maneha e debate aki, y e supuesto intento pa kita atencion for di e conexion cu e ley di Rijkswet HOFA, ta lanta bandera cora tocante e transparencia y e posicion di e fraccion aki den defensa di e autonomia di nos pais.
Un silencio sospechoso den parlamento
E reunion publico a resalta pa un falta di claridad cu ta causa preocupacion den e esfera politico. Mientras cu e punto di agenda tabata e creacion di un fondo pa inversion, e realidad cu ta scondi tras di e ley aki ta e vinculo directo cu e Rijkswet HOFA (Houdbaarheid Financiën Aruba) for di porta di cushina. Hopi ta esnan cu ta cuestiona dicon gobierno y su sostenedornan den parlamento ta asina reticente pa admiti e influencia di e ley di supervision financiero aki den e fondo propuesto.
Muzanne Wever vs. Interes di Pueblo
Durante e reunion, Parlamentario Muzanne Wever a opta pa sali na vanguardia di su minister, Geoffrey Wever, enbes di pone interes di pueblo di Aruba prome. E accion aki a wordo cataloga como un strategia di “defensa ciega”.
E critica principal ta cu, enbes di confronta e realidad di e ley y splica pueblo e consecuencianan directo pa nos autonomia, e parlamentario a purba di minimisa e presencia di HOFA den e ley di fondo di inversion. E esfuerso aki pa “tapa” e realidad di e maneho di e minister ta wordo bisto como un intento pa evita cu e cara berdadero di FUTURO sali na cla, un cara di “entregismo” na Hulanda.
E peligro di un fondo sin control
E preocupacion di opositor politico ta bay mas leu cu djis e discusion parlamentario. E fondo di inversion aki, cu den su structura tin e dede di HOFA, ta wordo mira como un instrumento cu por priva e control financiero necesario. Sin un bista cla riba con placa di pueblo ta wordo uza, y sin e control nan adecua, tin e riesgo cu e fondo aki por bira un desaster financiero.
E pregunta cu ta keda den aire ta: Dicon tin tanto miedo pa debati abiertamente riba e vinculo entre e fondo di inversion y HOFA y LWHO? Si e maneho ta uno transparente, dicon ta purba di sconde e realidad di e ley tras di argumentonan cu ta trata na kita atencion for di e condicionnan impone pa Hulanda?
Traicion na e nan huramentacion
Parlamentarionan a huramenta pa proteha e interes di Pais Aruba y su pueblo. E postura adopta pa fraccion di FUTURO den e reunion aki ta wordo mira pa hopi como un falta di capacidad y un negligencia di e deber sagrado aki. Ora cu e representantenan di pueblo ta scoge pa proteha un minister enbes di esnan cu a duna nan e confiansa na urnanan, e autonomia di Aruba ta keda den peliger.
E discusion rond di e “fondo presupuestario pa inversion” ta apenas e punta di e ijsberg. Pueblo ta exigi claridad y un postura firme contra cualkier medida cu por entrega e sobirania di Aruba. E pregunta ta: lo mantene nan mes den e linea di “tapa” e minister, of lo cuminsa actua na altura di e responsabilidad cu e pueblo di Aruba a deposita den nan?