Esaki ta kousa di hopi problema sosial i di salú di nos pueblo
Frakshon MAN-PIN a tuma nota di e raport di Enkuesta Sosial 2025, prepará pa Ofisina Sentral di Estadístika (CBS), den kua ta ser mustrá diferente aspektonan di e realidat sosial i ekonomiko di nos pais.
E rapòrt ta indiká ku situashon sosial-ekonómiko di hopi kasnan di famia ta bou di preshon. No ta un sekreto ku pobresa ta aumentando den nos pais i ku hopi famianan tin difikultat pa kubri nan nesesidatnan básiko.
Segun e enkuesta, na aña 2025, 53,6% di kasnan di famia no por kumpli ku pago di nan debenan. Esaki ta reflehá e preshon finansiero grandi ku hopi famia ta eksperensiando. Den e último añanan, e problemátika di deudanan a bira un tema importante den diferente diskushonnan, konsiderando ku un kantidat grandi di hende mester fia sèn pa por kubri gasto básiko di bida. E yamada pa un instansia ofisial ku por ofresé guia i asistensia na personanan ku ta enfrentá problemanan di debe ta mas urgente ku nunka.
Ademas, e situashon aki tin konsekuensianan ku bai mas aleu ku solamente e aspekto finansiero. E ta afektá e bienestar sosial i mental di hende, i tambe nan salú físiko. Konforme e publikashon di CBS, un grupo grandi den nos komunidat no ta hasi sufisiente aktividat físiko pa mantene un estilo di bida salú. Na mes momentu, hopi hende ta bishitá dòkter pa motibunan médiko òf ta “meld ziek” na trabou, situashonnan ku por tin relashon ku strès i preshon finansiero.
Riba e tema aki nos frakshon a hasi un total di 7 pregunta i ta pidi Gobiernu den kaso aki Minister di SOAW pa tuma akshon
*Minister a tuma nota di e raport Enkuesta Sosial 2025 di Ofisina Sentral di Estadístika (CBS)?
*Minister ta konsiente di e situashon finansiero difísil den kua hopi kasnan di famia ta enkontrá?
*Minister ta na altura di e echo ku e problemátika di deudanan ta pone hopi hende biba bou di strès, ku por tin konsekuensianan pa nan salú mental i físiko?
*Kiko ta e vishon di Gobièrnu i kua medidanan konkretu ta ser prepará pa atendé e problemátika aki, tantu riba término kòrtiku komo largu?
*Gobièrnu ta dispuesto pa deklará e problemátika di deudanan di kasnan di famia komo un di e prioridatnan prinsipal den su maneho di polítika sosial?
*Den kua periodo Gobièrnu ta presentá i implementá medidanan konkreto pa atendé e problemátika aki, konsiderando ku e situashon ta kontribuí na problemanan sosial, ekonomiko i di salú públiko?
*Kon a para ku e maneho di pobresa ku a ser priminti?