Inspeccion di Volksgezondheid Aruba ta preparando pa su proximo evento grandi den sector medico. E di cuater edicion di e Quality of Healthcare Conference IVA 2026, titula “Risky Business”, ta promete di trece profesionalnan hunto pa trata retonan critico rond di maneho di riesgo y siguridad den cuido di salud.
Asina leu, e interes pa e conferencia aki tabata sumamente halto. E organisacion a confirma oficialmente cu e registracion pa e evento ta completo, loke ta subraya e urgencia y e compromiso di e sector medico local cu e temanan aki. Pa esnan cu no a logra anota a tempo pero cu ainda ta desea di ta presente, tin e opcion pa apunta riba un lista di espera via e link cu e inspectorado a pone disponibel.
Un Programa Riba Nivel
E dia lo cuminsa trempan cu registracion y un apertura oficial pa 8:30 di mainta dor di Inspector General, Dorylee Pappers-Lopez Penha, siguí pa un palabra di bon bini y apertura oficial dor di e Minister di Salubridad Publico, Asunto Social, Cuido di Grandinan y Adiccion, Mervin Wyatt-Ras.
E programa ta inclui varios ponencia clave y interactivo, entre otro:
• Maneho di Disrupcion: Emily Ras, MSc lo presenta e tema “What If Tomorrow Doesn’t Go as Planned? Managing Disruption Before It Manages You” pa 8:50.
• Siguridad den Cuido: Ian Leistikow, PhD lo duna un charla tocante e transicion di eror humano pa resiliencia di sistema pa 9:20.
• Innovacion y Maneho: Sulima Geerman, PhD y Ingmar Ramharakh lo trata temanan crucial manera “Flirting with Risk” y “From Risk to Results” durante e mainta.
• Salud Publico: Chris Franca, MD lo enfoca riba maneho di riesgo di salud y screening di cancer di trip pa 11:35.
Sesionnan Interactivo (Breakouts)
Un aspecto importante di e conferencia ta e oportunidad pa tur asistente participa na tres sesion di “breakout” diferente, caminda lo mpera un sistema di rotacion entre sala:
• Sala A: Expect the Unexpected: From Risk-Based Governance to Business Continuity.
• Sala B: Risk It, Learn It, Fix It: Turning Complexity into Practical Improvement.
• Sala C: From Blind Spots to Better Outcomes: Applying Safety Science and Early Detection to Prevent Harm.
E conferencia lo clausura den e sala principal despues di un sesion general pa evalua e leccionnan siña di e dianan aki. Cu elema “Risk informed, quality driven”, e evento aki ta reafirma e meta di Aruba su inspectorado pa sigui eleva e estandar di calidad y seguridad den nos sector medico.
