E debate rond di e biahe di trabou di minister a tuma uniro di atencion despues cu e comision di LAR a duna su conseho riba e peticionnan riba viahe di Minister Gerlien Croes. E proceso, cu a cuminsa formalmente riba 10 di juli, a trece claridad tocante e deber di un minister pa duna cuenta na Parlamento.
Segun e lider di fraccion di MEP Evelyn Wever Croes , e conseho di LAR tabata cla y duro, indicando cu e obhecionnan expresa pa colega Tjon y mi persona tabata ge-grond y fundamental riba base. E comision a conseha e minister pa duna contesta na e preguntanan cu a keda haci. E punto central di e desaroyo aki ta cu un minister mester duna cuenta, un principio cu ta conta pa tur miembro di gobernacion, sin excepcion. Esaki ta destaca specialmente mirando cu e minister na varios ocasion a declara di no ta duna cuenta na comision of na parlamentario specifico, loke awor ta wordo contradeci pa e conseho di LAR.
A pesar cu e conseho a wordo comparti cu prensa pa publicacion publico, e contesta di e minister riba e decision di 28 di augustus a trece un contradiccion na cla. E minister a declara e obhecionnan como infunda y a mantene su decision original, nenga e peticion original di e parlamentarionan. Sinembargo, aunke e peticion no a wordo honra, e minister a opta toch pa contesta parti di e preguntanan.
Di e shete preguntanan presenta, un so a keda contesta completamente, un otro parcialmente, mientras cu e demas preguntanan a keda sin contesta. E falta di contestacion completo aki ta wordo mira como un factor cu ta duna mas informacion serio, treciendo tras di dje consecuencia aún mas serio pa e mandatario envolvi.