Muzaninne Wever, den nomber di e fraccion di FUTURO, a ricibi e manifesto entrega pa ex-mandatario Otmar Oduber y a confirma cu su fraccion lo bay rechasa y analisa detayadamente e contenidonan di e documento. Wever a remarca cu den un estado di derecho ta fundamental pa tin un husticia hustu (fair) pa tur persona, protegiendo e ciudadanonan y funcionarianan contra persecucion di mala fe.
Ningun persona no mag di ta riba ley, pero na mes momento ningun hende na Aruba mester wordo persigui inhustamente pa motibo di un ley o motibonan personal y politico.
Den un sociedad chikito manera Aruba, unda tur hende conoce otro, e sistema por bira hopi facil pa destrui of “pa sa bida” di un persona. Persecucion penal no por wordo encamina pa motivacionnan di revancha, antipatia personal of pa e posicion politico cu un hende ta tene.
Fraccion FUTURO lo haci e follow-up necesario cu Gobierno pa averigua e estado real di e ley cu ainda no a wordo aproba/echecuta, compronde e obstaculonan y busca sa pakico e no a drenta na vigor ainda.
Parlamentario Muzaninne Wever a señala cu asumi un posicion politico ta pone un persona den un situacion hopi vuerabel frente na contrincantenan cu por busca pa atrapa of deshaci di dje pa e simpel hecho cu e ta representa un peliger pa nan posicion of poder. Esaki “no por tin luga hamas y nunca den nos sistema na Aruba.”
A toca tambe e tema di inmunidad parlamentario den reunionnan publico, criticando con algun politico ta uza e Inmunidad aki pa descredita, insulta y trece engaño riba e persona en bes di debati e asunto mes. Esaki, igual cu e abusonan den e tereno penal, ta inaceptabel.
Wever a conclui enfatisando cu tanto Ministerio Publico, Procurador General y e leynan cu ta wordo trata den sala di Parlamento mester garantisa un tratamento husto pa tur hende sin excepcion.