Recientemente Cuerpual Policial Hulanda Caribense (KPCN) a ricibi motocicleta nobo di polis. E motocicletanan ta un adicion riba e flota existente di vehiculonan policial y ta contribui na mas flexibilidad, mientras cu e ta fortalece e visibilidad di polis riba caya. Durante siman di Regatta, e ekipo di motocicleta lo ta visibel pa prome biaha riba caminda publico na Boneiro.
E motocicleta nobo ta ekipa cu e ‘striping’ di polis, sirena y borchinan di informacion special cu ta permiti agentenan duna instruccion na demas usuarionan di caminda. Di e manera aki, e motocicleta ta facil pa reconoce como vehiculo policial y por haci uzo di dje pa vigilancia y mantencion di ley den trafico.
Mas rapido y flexible den accion
E motocicletanan nobo ta brinda agentenan mas posibilidad pa actua di manera flexible y efectivo. Danki na e facilidad pa maniobra cu e motocicleta, agentenan por move mas facil di un sitio pa otro, asta durante momentonan di hopi trafico of na lugarnan unda auto di polis no por yega facil. Di e manera aki, nan por reacciona mas lihe riba notificacionnan, sostene coleganan durante incidentenan y haci vigilancia na diferente localidad. Por haci uzo di e motocicleta pa patruyanan preventivo, control di trafico y vigilancia durante eventonan.
E motocicleta di polis ta un adicion balioso door di combina e velocidad y movilidad di un auto policial cu e accesibilidad di un patruya na pia of riba bicicleta. Asina, agentenan por move rapidamente di un sitio pa otro, mientras cu nan ta keda visibel y accesibel pa comunidad.
Prome presencia visibel durante Regatta
Durante siman di Regatta, e ekipo di motocicleta lo ta visibel riba caminda publico pa prome biaha. E motocicletanan ta bin acerca banda di e otro patruyanan di polis cu lo ta activo durante e festividadesnan, cu e meta pa garantisa orden publico y siguridad den trafico.
Cu e adicion aki, KPCN ta dal un paso importante pa dilanti den efectividad di operacion di polis na Boneiro. E motocicletanan nobo di polis ta brinda mas posibilidad pa actua rapidamente ora comunidad tin mester di polis.