Dia 18 di ougùstùs 2025 diputado Silberie, a risibí e desishon ofisial di direktor general Roald Laperre (Ministerio di Asuntunan Interno i Relashonnan den Reino). Ku esaki e Agènda di Akshon Pasado di Sklabitut ta ofisialmente aprobá.
Ku e aprobashon akí a keda konfirmá ku Boneiru ta risibí 6,1 mion dòler di Reino. Ta bai usa e sèn akí pa proyektonan ku ta sòru pa rekonosementu, edukashon, kultura i rekuperashon ku enfoke riba futuro. Di e manera akí ta para ketu na pasado di sklabitut i na e impakto ku esaki tin riba nos bida di awendia.
A formulá e Agènda di Akshon huntu ku habitantenan, organisashonnan sosial i partnernan for di den region. Ta bai usa e sèn pa e siguiente proyektonan:
Un método nobo di lès di hulandes komo idioma straño, ku Direktorado di Komunidat i Kuido ta desaroyá huntu ku fundashonnan lokal di enseñansa i partnernan for di Aruba i Kòrsou ku ta kompartí konosementu i sosten.
Digitalisá archivonan boneriano i hasi nan aksesibel. Ehekushon di esaki ta den man di Direktorado di Maneho i Sosten / Departamento di Pòst i Archivo, den kolaborashon ku FuHiKuBo.
Formulashon di un kánòn i un liña di tempu di historia di Boneiru, bou di guia di Direktorado di Komunidat i Kuido.
Konstrukshon di un monumento di nòmber i investigashon pa loke ta trata nòmber di hendenan sklabisá, un inisiativa di e Grupo di Diálogo Boneiru huntu ku Direktorado di Planifikashon i Desaroyo i Direktorado di Komunidat i Kuido.
Fortifikashon di interkambio di patrimonio i kultura karibense, ku atenshon spesial pa promoshon di salú mental di nos hóbennan i nan famia. Direktorado di Komunidat i Kuido huntu ku Mental Health Caribbean ta ehekutá e proyekto akí.
Ehekushon di e Agènda di Akshon ta ranka sali den e último kuartal di aña 2025 i ta sigui kana te na luna di sèptèmber 2029.
Kolegio Ehekutivo ta enfatisá ku e agènda akí a bira realidat, danki na aporte amplio di nos habitantenan. Durante e enkuentronan di partisipashon Papia ku Pueblo hopi boneriano a kompartí nan ideanan i deseonan.
Kolegio Ehekutivo ta ekspresá un danki spesial na e personanan ku a inisiá i guia e proseso akí: èks diputado Nina den Heyer, e representante atministrativo di pasado di sklabitut Alfrida Martis, e presidente di Plataforma NGO Boneiru Lauriane Ammerlaan i e komishon lokal di konseho pa Konmemorashon, Impakto i Futuro bou di guia di Maideline Martijn-Hooi.
‘E aprobashon akí ta marka un momentu históriko. Awor Boneiru ta haña e fondonan i e rekonosementu pa prosesá nos pasado di sklabitut i konhuntamente edifiká un futuro ku mas konekshon i orguyo,’ segun Kolegio Ehekutivo.