Local

A.T.A. REFERIENDO NA ESTADISTICA PA JANUARI 2020: E IMPACTO DI VENEZUELA TA RESALTA Y NORTE AMERICA TA SIGUI CRECE


ORANJESTAD, Aruba

A base continuo Oficina di Turismo di Aruba (A.T.A.) ta registra y analisa e estadisticanan referente nos industria turistico y ta raporta esakinan. Debi na cambio den e sistema RADEX (cu ta registra tur bishitante cu ta drenta y sali for di Aruba) cual fin di aña 2018 a wordo modernisa na un programa mas avansa, a experiencia un tardansa inespera pa cu e raportage di e cifranan mensual. Esaki a resulta den un ‘backlog’ durante aña 2019 unda e cifranan pa cu turismo Stay-Over no por a sali mensualmente manera ta custumber. Sinembargo e departmentonan concerni a traha duro pa por reporta esaki mensualmente atrobe iniciando cu januari 2020! Pa cu 2019, lunanan di november y december ta pendiente finalisacion.

A continuacion ta elabora riba e cantidad di Turismo ‘Stay-Over’, Turismo Crucero, Entrada General di Turismo (Tourism Credits) y estadistica di AHATA.

Turismo ‘Stay-Over’

Aruba ta wordo representa den tres continente y durante luna di januari 2020 a yama bonbini na un total di 90.623 bishitante ‘stay-over’. Esaki ta -3.8% (-3.621 turista menos) compara cu e mesun temporada pa 2019. Notabel ta cu un total di 3.198 menos turista ta procedente di e mercado di Venezuela a bishita.   

For di Norte America por mira un aumento di bishitante di 4% (2.889 turista mas), en total 74.766 turista, compara cu januari aña pasa. Merca a aumenta cu 3.6% (2.383 turista mas) en total 67.817 turista y Canada a aumenta cu 7.9% (506 turista mas), en total 6.949 turista compara cu e mesun luna na 2019. Norte America a contribui cu 82.5% di e total di bishitante pa nos isla.

E continente Latino Americano a baha cu -41.7% (5.260 turista menos) total 7.343 turista menos di LATAM. E ausencia di Venezuela ta resalta cu un caida di 84.8% (3.198 turista menos). En total 574 turista di Venezuela a bishita, no obstante cu frontera ta cera (esta via Panama, Bogota entre otro). Otro mercadonan clave di Latino America tambe a baha. Retonan economico den varios mercado a causa bahada for di entre otro Colombia cu -28.9% (962 turista menos) total 2.367 turista Colombiano y Brasil cu -28.1% (305 turista menos) total 780 turista Brasilero a bishita nos destinacion. Conforme situacion den e paisnan aki y retonan cu a impacta aerolineanan Latino Americano, por bisa cu e bahada ta bay man den man cu bahada den cantidad di asiento aereo pa januari, for di entre otro Avianca. E continente di Latino America a trece 8.1% di e total di turismo pa luna di januari pa nos isla.

Pa loke ta Europa nos por mira reto pa cu e bishitantenan pa nos destinacion cu un declinacion di -12.4% (978 turista menos) total 6.899 turista Europeo a bishita nos compara cu e mesun luna aña pasa. Aki tambe aspectonan economico ta hunga un papel, entre otro e balor di e dollar Mericano versus e Euro cu a subi cu 3.4% durante 2019. Pa e bishitante Europeo, esaki ta afecta e prijs di estadia como tambe e prijs di pasashi (door di e jet-fuel su prijs a aumenta). Aruba ta keda un ‘long-haul destination’ cu prijsnan eleva, algo cu kisas ta hacie mas sensitivo pa scoge pa Aruba considerando elevacion den costo di un vacacion. Reinonan Uni a baha cu -6.2% (18 turista menos) pa un total di 272 turista, Hulanda a baha cu -15.7% (653 turista menos) pa un total di 3.499 turista y Alemania a baha cu -10.5% (51 turista menos) pa un total di 434 turista. E continente Europeo a representa 7.6% di turismo pa Aruba pa luna di januari 2020.

Turismo Crucero

Durante periodo di januari, 112.614 pasaheronan crucero a bishita nos destinacion riba un total di 52 diferente barconan crucero. Compara cu e mesun luna di aña pasa, turismo crucero a baha cu 12.3% (15.811 turista crucero menos). Barconan crucero a baha cu 8 barco cu ta 15.4% menos. E perspectiva pa e aña completo ta keda positivo cu un total di 840.000 bishitante. 

Tourism Credits / Central Bank of Aruba

Di acuerdo cu Banco Central e asina yama ‘Tourism Credits’ (cual anteriomente tawata wordo yama ‘Tourism Receipts’) pa e prome mita di aña 2019 a contribui cu AWG 1.946.5 miyon den nos economia, cu ta un aumento di 5.1% compara cu e mesun temporada na 2018. CBA no a publica otro resultadonan na es momentonan aki. 

Hotelnan / AHATA

Segun Aruba Hotel and Tourism Association, na januari 2020, e ‘Average Daily Rate’ (ADR) a aumenta cu 3.4% compara cu e mesun luna na 2019. Esaki den cifra ta US$ 355.44 na 2019 compara cu US$ 367.67 pa 2020. E entrada pa camber disponibel, e asina yama RevPAR a baha cu -2.7% di US$ 315.28 pa US$ 306.61 na januari 2020. E anochinan ocupa (ORN) pa camber a baha cu -3.7%. 

E cifranan di AHATA ta basa riba 18 propiedadnan cual ta mayoria di e hotelnan cu excepcion di Hilton Aruba Caribbean Resort & Casino. 


Related posts

Pa prome bes den historia Arubano: Un foro electoral cu lo enfoca riba e balor di Cultura y Creatividad

EA News Author

Ta revoca exoneracion di test pa biaheronan procedente for di Corsou.

EA News Author

Pronostico di tempo diasabra 16 di april 2022

EA News Author

Leave a Comment