Alabes ta comparti resultado di e encuesta anual di turismo crucero
Aruba Tourism Authority (A.T.A.), a traves di su departamento di Strategy, Planning and Research (SPR), a presenta e resultado di su encuesta anual di turismo crucero 2025. E estudio, basa riba 2.414 encuesta colecta na 2025, ta ofrece informacion importante tocante e profiel, comportacion y experiencia di bishitantenan crucero cu ta bishita Aruba. E resultado ta confirma cu Aruba ta ocupa un posicion fuerte como destinacion di crucero, cu 81% di e encuestadonan indicando cu presencia di Aruba den e itinerario a influencia nan decision pa tuma e crucero specifico aki. Ademas, 81% ta representa un aumento compara cu 78% den 2024.
E investigacion tambe ta mustra cu bishitantenan di crucero ta aprecia nan experiencia na Aruba. Tur 14 atributo midi den e encuesta a mustra mehoracion compara cu 2024, cu playa, siguridad y hospitalidad local obteniendo e puntuacionnan mas halto. Ademas, e gasto promedio pa persona durante un parada di crucero a alcansa USD 197, cu e categorianan di gasto principal siendo excursionnan, artesania local y cuminda y bebida (F&B). Pues, turismo crucero ta sigui genera actividad economico den diferente sector riba nos isla.
ESTADISTICANAN CONFORME ACTUALISACION DEN E INDUSTRIA DI TURISMO
STAYOVER, ESTADIA Y PARTICIPACION DI MERCADO
Den luna di juni 2026, Aruba a ricibi un total di 143.343 bishitante stayover y a registra un total di 912.256 nochinan di estadia, cu un promedio di estadia (Average Length of Stay – ALOS) di 6,4 anochi. E resultado aki ta confirma un desempeño positivo pa e industria di turismo durante luna di juni.
E distribucion di mercado durante juni a mustra cu Norte America a sigui ta e mercado principal, representando 73,6% di tur yegadanan. Sur America a contribui cu 20,3%, Europa cu 3,5%, mientras cu otro regionnan a representa 2,5% di total di bishitantenan. Estados Unidos ta e mercado individual mas grandi pa e luna di juni cu 102.224 bishitante, mientras cu Argentina a registra 11.682 bishitante pa juni, un aumento fuerte compara cu juni 2025. Hulanda ta lidera e mercado Europeo cu 2.755 bishitante.
Dato di profiel di bishitante ta indica cu Aruba ta wordo bishita pa un mescla di generacionnan. Durante juni 2026, Generation X a representa 26,8% total di bishitantenan, sigui pa Millennials cu 25,4% y Generation Z cu 20,8%. Baby Boomers a representa 18,8% di total di yegadanan.
Bishita www.ata.aw tur luna pa e Statistical Monthly Report.
