BonaireFeaturedInternacional

Tourism Corporation Bonaire den koperashon ku FuHiKuBo ta lansa proyekto nobo di señalisashon rònt Boneiru

Tcb X Fuhikubo

Alsando eksperensia di bishitante ku konosementu di historia i patrimonio di Boneiru

Ku orguyo Tourism Corporation Bonaire (TCB) ta anunsiá su kolaborashon ku Fundashon Históriko Kultural Boneriano (FuHiKuBo) pa loke ta trata e Proyekto di Señalisashon Boneiru.

Komo parti di e Plan di Rekuperashon di Turismo, mehorashon di produkto ta un di e metanan mas importante pa mehorá eksperensia di bishitante. Meta di TCB ta pa ekspandé e bentaha di desaroyo turístiko pa esaki alkansá un segmento mas amplio di habitantenan di Boneiru, pa medio di informá nos komunidat, pero tambe pa medio di proveé nos bishitantenan ku informashon eksakto tokante diferente elemento di nos patrimonio tangibel i intangibel i tokante historia di Boneiru, mediante e proyekto di señalisashon.

Pa logra e meta akí, FuHiKuBo i TCB a drenta un kolaborashon kaminda FuHiKuBo ta brinda material balioso for di nan kolekshon i archivonan tokante diferente sitio na nos isla ku ta bale la pena pa dediká atenshon na nan. Ku su ekspertonan FuHiKuBo lo duna konseho na momentu di selekshon di e sitionan ku mester inkluí den e proyekto di señalisashon. Aktualmente tin te ku 67 sitio potensial kaminda por pone bòrchi pa engrandesé konosementu di nos poblashon lokal i bishitantenan. Pa por mantené e bòrchinan di informashon den koherensia ku Bonaire Branding , TCB lo diseñá i organisá produkshon i ponementu di e bòrchinan. 

‘Ta importante pa tene nos balornan bibu pa medio di keda informá nos bishitantenan i nos komunidat tokante nos historia i patrimonio tangibel i intangibel asina riku, i tokante nos esfuersonan pa preservá nos propiedatnan kultural i históriko na Boneiru. Nos ta kere fuertemente den kolaborashon i nos ke gradisí FuHiKuBo pa nan sosten i kontribushon’, segun Miles B M Mercera, direktor di TCB. 

Den futuro FuHiKuBo i TCB lo sigui eksplorá i realisá vários manera pa ofresé mas konosementu di nos kultura i historia na nos komunidat i nos bishitantenan.

Related posts

SABIDURIA DEN NOS ALEGRIA Skirbi pa Ruthy”Lady Ruth” Vrieswijk Bergen

EA News Author

Tripartiet entre Aruba, Sint Maarten y Corsou

EA News Author

Nos mester sigui e protocolnan di higiena y nos mes mester cuida nos mes

EA News Author

Leave a Comment

Whatsapp Message