Kuerpo Polisial Hulanda Karibense (KPCN) ta publiká e Análisis di Kriminalidat 2020-2024. Esaki ta e di tres análisis di kriminalidat desde 2010 i ta duna un bista di e desaroyonan di kriminalidat na Boneiru, Sint Eustatius i Saba durante e kuater añanan ku a pasa. Ademas e ta sirbi komo e base pa un enfoke stratégiko riba seguridat i mantenshon di lei na Hulanda Karibense Kontrali na edishonnan anterior, e análisis aki ta kompletamente kompilá pa analistanan di KPCN. E análisis ta ofresé e stipuladó di maneho i siudadanonan un bista balioso pa enfoke konhunto i desafionan di seguridat.
Puntonan klave for di e CBA 2020-2024
E análisis ta mustra vários tendensia ku tin influensia riba seguridat den e region:
- Kriminalidat den tráfiko: Ta keda un reto pa motibu di problema ku mantenshon di kareteranan, oumento di tráfiko i uso di alkohòl.
- Kriminalidat bou di hubentut: Oumento preokupante di ladronisia i violensia, miéntras ku tin un skarsedat di kuido hubenil i posibilidatnan di rehabilitashon.
- Kriminalidat violento: Oumento di entre otro violensia doméstiko i violensia durante bida nokturno, pa kual mester di medidanan adishonal.
- Kriminalidat kontra poseshon i propiedat: Aunke a baha por lo general, pero tin preokupashon tokante ladronisia di skuter na Boneiru i ladronisia den kas na Saba.
- Eksportashon di droga: Prinsipalmente for di Boneiru ta un problema grandi, ku visibilidat limitá riba e ret kriminal enbolbí.
- Oumento di insidentenan ku arma di kandela: Oumento preokupante, prinsipalmente den e di dos mitar di 2024, kaminda gran parti ta sospechosonan hóben.
- Kriminalidat di migrashon: Oumento di trafikashon di hende i eksplotashon, debí na instabilidat polítiko den e region.
- Kriminalidat finansiero i ekonómiko: Froude i labamentu di plaka, prinsipalmente den sektor di propiedatnan inmóbil. Difísilmente por midi korupshon, pero tin indikashon di violashon di integridat ofisial.
-
- Kriminalidat sibernétiko: Oumento di notifikashon di froude digital i “hacking”. “Cybercrime Unit” (CCU) ta oumentá konsientisashon,miéntras ku detekshon ta keda un reto.
- Kriminalidat ambiental: Depósito ilegal di shushi i daño na ref di koral ta forma un menasa kresiente, ku ta rekerí un mantenshon mas estrikto.
Base pa prioridatnan stratégiko
CBA ta basá riba dato di KPCN, komplementá ku informashon di entre otro Ministerio Públiko, Koninklijke Marechaussee, Wardakosta parti karibense i e tim di kolaborashon di Reshèrshi. Dor di e kolaborashon estrecho ku partnernan di kadena ta originá un bista kompletu di desaroyonan di kriminalidat.E meta ta pa identifiká patronchinan di kriminalidat, señalá trèntnan na tempu i desaroyá strategia dirigí. Dor di kompartí e informashon aki, KPCN ke kontribuí na un ambiente di biba seif i stimulá medidanan efektivo kontra kriminalidat. E CBA ta dirigí su mes riba stipuladó di maneho, partnernan kolaboradó i komunidat, ya asina tur hende ta komprondé mihó kiko ta pasando i kon por traha huntu riba seguridat. A base di e investigashon, KPCN huntu ku partnernan di kadena lo stipulá e prioridatnan stratégiko pa e añanan benidero.
Forsa di intel i análisis
Hefe di e departamentu di Informashon i Ekspertisio, señor Melvin Sint Jago, ta enfatisá e importansia di e análisis aki pa un mantenshon di órden efektivo basá riba intel:“Dor di analisá dato di kriminalidat sistemátikamente, nos por señalá trèntnan trempan i desaroyá un strategia dirigí. Esaki ta hasi nos dispuesto pa atendé proaktivo i usa nos medionan mas efisiente, loke ku ta esensial pa un Hulanda Karibense mas seif.”
