Aruba Bank a cuminsa su gran celebracion di 100 aña cu un fiesta di aña nobo pa su empleadonan, marcando e inicio di un aña dedica na honra e herencia di banco y pone bista riba futuro.
E anochi di alegria a tuma luga den un ambiente di celebracion y a inclui un discurso special di Sharon Fränkel-de Cuba, Managing Director di Aruba Bank. Sharon a expresa gratitud na su empleadonan, y a describi nan como e “motor di e banco.”
“Durante e 100 aña cu a pasa, Aruba Bank a sirbi como un pilar di nos comunidad, y e confiansa ta e fundeshi di nos exito. Mientras nos ta celebra e momento special aki, nos mester honra nos experiancia sin igual como pioneronan den e mundo bancario y continua inova pa sigui move pa dilanti,” el a expresa.
Empleadonan y invitadonan a participa y e “dresscode” pa evento tabata color blauw, cu ta simbolisa nos marca. E anochi tabata yen di entretenimento, cu a inclui presentacion di Buleria y Skale, cu a crea un ambiente festivo y bon ambiente.
Mientras Aruba Bank ta celebra un siglo di excelencia, e banco ta spera un aña yen di evento di celebracion, reafirmando su compromiso pa sirbi comunidad Arubano cu profesionalismo, inovacion, y enfoke riba construi un futuro mas briyante.
