Riba diabierna 28 di november INDEBON a manda un delegacion di bintidos atleta hoben Paraguay, pa participa na “Juegos Escolares”, conoci tambe como CONSUDE na Asuncion.
E competencianan deportivo pa mucha di scol den edad di 12 pa 14 aña ta tuma luga for di 30 di november te 7 di december. Boneiro ta participa na e competencianan di atletismo, basketball, ahedres, futbol di sala y landamento.
Diputado Peter Silberie tambe ta forma parti di e delegacion hunto cu e coachnan y e guianan. Silberie no por a biaha hunto cu e hobennan, pero prome cu cuminsamento di e weganan e ta join nan na Paraguay. ‘Mi ta contento cu nos atletanan hoben por a participa na :Juegos Escolares”. Nivel di e weganan ta hopi halto. Intencion di “Juegos Escolares” ta netamente pa cada atleta por sigui desaroya su mes pa medio di participa na e weganan,’ asina e diputado a splica. Banda di esaki tin un otro punto importante. ‘Pa medio di participacion na e weganan, nos ta haci e laso entre Boneiro y e pais anfitrion mas fuerte.’
Banda di Paraguay y Boneiro, e siguiente paisnan tambe ta participa: Argentina,Brazil, Chile, Colombia, Uruguay, Ecuador, Peru y Venezuela. ‘Mi ta sinti mi honra cu nos atletanan ta participa
na “Juegos Escolares”. Esaki ta bon tambe pa promocion di nos isla den exterior,’ asina e diputado
a declara.
INDEBON ta sigui compromete su mes pa desaroyo di talento deportivo hoben na nos isla. INDEBON ta desea tur atleta hopi exito na Paraguay. Press Release OLB
