Entidat Publico Boneiro (EPB) y Ministerio di Asuntonan Interno y Relacionnan di Reino (BZK) a firma un anexo riba 19 di juni ultimo, hunto cu e acuerdo di administracion pa atende cu Selibon Lagun. Cu e anexo aki, EPB y BZK ta confirma nan esfuerso conhunto pa ehecuta e acuerdonan administrativo cu a wordo sinta riba 20 di november 2025, sosteni pa Ministerio di Infrastructura y Maneho di Awa (IenW) y Ministerio di Agricultura, Pesca, Siguridad di Alimento y Naturalesa (LVVN).
Den e acuerdo gubernamental tin palabracionnan mas concreto tocante ehecucion di e recomendacionnan di e investigacion riba Selibon, ehecuta pa KPMG, y tocante e financiamento di maneho di desperdicio na Boneiro pa e periodo 2026-2028. For di e investigacion aki a resulta cu medidanan y inversionnan complementario ta necesario pa yega na un sistema di maneho di desperdicio duradero, seguro y prepara pa futuro. E gasto financiero total ta suma alrededor di USD 40,1 miyon, cual ta consisti di gastunan operativo y inversionnan den ekipo y infrastructura.
Durante e periodo cu a pasa, ya caba a tuma pasonan importante. Por ehempel, a tuma medidanan pa garantisa continuidad operacional di Selibon, ta hici inversion den ekipo nobo, y EPB ta traha hunto cu BZK riba solucionnan structural pa procesamento di desperdicio na Boneiro. Esaki a resulta, entre otro, den terminacion di e supervision intergubernamental. Colegio Ehecutivo a compromete su mes pa ehecuta e recomendacionnan di e raport di KPMG. Pa aña 2026, EPB lo pone un suma adicional di USD 4,4 miyon disponibel via di e di dos cambio di presupuesto di e aña aki. Ademas, pa e periodo 2026-2028, lo inverti un total di USD 5,1 miyon den ekipo, infrastructura y den fortificacion continuo di e maneho operacional di Selibon.
Colegio Ehecutivo a duna encargo pa haci un investigacion independiente tocante e factibilidad financiero, como tambe riba sitionan alternativo pa recoleccion y procesamento di desperdicio. E investigacion aki ta wordo ehecuta na e momentonan aki. Ta spera e resultadonan memey di augustus, y nan lo hunga un papel importante den e siguiente decisionnan tocante maneho di desperdicio na Boneiro.
Cu e anexo aki, EPB y BZK conhuntamente ta duna mas contenido na e acuerdonan administrativo cu a wordo sinta na final di aña 2025. Cu esaki, ta dal un paso importante den direccion di un maneho operacional duradero, un miho proteccion pa hende y medio ambiente, y un cadena di desperdicio pa Boneiro cu ta prepara pa futuro.