Ku hopi orguyo Tourism Corporation Bonaire (TCB) ta anunsiá un programa di aktividat ku ta dura henter luna di sèptèmber pa selebrá Luna di Turismo, ku komo punto kulminante selebrashon di Dia Mundial di Turismo dia 27 di sèptèmber.
Durante henter e luna akí TCB ta organisá vários aktividat pa selebrá Boneiru su kultura, su patrimonio, su sektor turístiko, su hendenan i su eksperensianan, ku ta hasi nos isla un destinashon úniko pa bishitantenan for di rònt mundu.
Tur djasabra den luna di sèptèmber, kuminsando dia 5 di sèptèmber, e bishitantenan ku baha na Flamingo International Airport di Boneiru ta haña un kaluroso bon biní estilo boneriano, yen di ritmo i músika folklóriko di nos isla. E bishitantenan ta haña oportunidat tambe pa topa ku embahadornan lokal di Boneiru, bistí ku trahe tradishonal folklóriko i saka potrèt ku nan. Komo muestra di apresio e bishitantenan ku yega ta risibí un regalo spesial di bon biní den kuadro di e programa di TCB pa mantené nos bishitantenan, esta Bonaire Ambassadors.
E festividatnan ta kontinuá ku Dia di Boneiru dia 6 di sèptèmber, un dia dediká na kultura, historia i identidat di nos isla. Na honor di e okashon importante akí tur kaminda na nos isla vários aktividat i evento ta tuma lugá.
“Luna di Turismo ta brinda nos un oportunidat pa no solamente selebrá importansia di Turismo pa Boneiru, pero tambe nos hendenan, nos kultura, nos patrimonio i nos eksperensianan ku ta hasi nos isla asina spesial”, segun Elesiër Angel, direktor di Tourism Corporation Bonaire. “Tur loke nos hasi riba tereno di turismo ta konektá ku otro, for di e eksperensianan ku nos ta krea pa nos bishitantenan te e oportunidatnan ku turismo ta ofresé na nos komunidat. Ku e aktividatnan akí nos ke selebrá nos isla, enbolbí nos habitantenan i sigui kompartí e karakter outéntiko di Boneiru ku mundu.”
Dia 19 di sèptèmber TCB ta organisá un spùrtògt turístiko na Rincon pa mucha di 8 te 12 aña. E evento dibertido i edukativo akí ta hiba e partisipantenan riba un biahe atraves di diferente sitio turístiko i históriko, kaminda nan por partisipá na diferente aktividat i siña mas tokante e historia i patrimonio riku di Boneiru. Ta anunsiá e ganadónan di e spùrtògt turístiko durante e evento di Taste of Bonaire dia 26 di sèptèmber.
Resientemente TCB a lansa tambe e siguiente edishon di Capture Bonaire Photo Contest 2026, kaminda nan ta invitá partisipantenan pa kapta i kompartí nan perspektiva úniko di nos isla. E kompetensia ta dura kuater siman for di 19 di ougùstùs te ku 16 di sèptèmber 2026 i e tres ganadónan ta keda selektá for di tur e potrètnan ku ta bini na remarke i ku nan a keda entregá via e plataforma ofisial di e kompetensia. Dia 23 di sèptèmber 2026 ta anunsiá e ganadónan.
Dia 24 i 25 di sèptèmber TCB ta organisá su kumbre anual di turismo, Bonaire Tourism Summit, ku komo tema “Everything is connected – Tur kos ta konektá”. Durante e kumbre akí e partnernan i stakeholdernan for di e sektor di turismo ta haña vários aktualisashon tokante e último desaroyonan den e sektor, entre otro konekshon áereo, inisiativa di merkadeo, strategia di relashonnan públiko i otro tópikonan importante ku ta determinante pa futuro di turismo na Boneiru. Nos ta enkurashá partnernan i stakeholdernan pa registrá i partisipá.
E selebrashon ku ta dura un luna largu ta alkansá su punto kulminante riba djasabra 26 di sèptèmber ku e siguiente edishon di Taste of Bonaire, kaminda habitantenan i bishitantenan ta bini huntu pa disfrutá di nos isla su oferta kulinario, su kultura, su músika i su sentido komunitario.
Ku Luna di Turismo, TCB ke fiha atenshon riba importansia di turismo pa Boneiru i na mes momentu krea oportunidat pa habitantenan, bishitantenan, partnernan for di e sektor i stakeholdernan pa drenta den kontakto ku otro, siña di otro i selebrá tur loke ta hasi Boneiru realmente un destinashon úniko.
Pa mas informashon tokante e aktividatnan durante Luna di Turismo, bo por tira un bista riba e kalènder di aktividat riba www.bonaireisland.com òf tuma kontakto ku TCB via marketing@bonaireisland.com.
