Den e era digital akí, medionan di komunikashon ta hunga un papel fundamental den formashon di opinion públiko i den e diferente prosesonan di toma di desishon polítiko. Sinembargo, e influensia aki no semper ta positivo. Den hopi kaso medionan di komunikashon por ehersé un influensia negativo riba e akshonnan i trabou polítiko di gobièrnu, spesialmente atraves di manipulashon (negativo) di informashon. Manipulashon di informashon di parti di medionan di komunikashon por manifestá su mes di diferente forma. Esun mas komun ta eskoho selektivo di notisia, unda medionan ta selekshoná kua storia nan ta kubri i kua nan ta ignorá, esaki ku e meta pa promové un agènda polítiko determiná óf kondishoná e persepshon públiko tokante un tópiko en partikular. E práktika aki por trose e realidat i krea un imágen robes di e susesonan.
Un otro forma di manipulashon di informashon ta duna un interpretashon eróneo na sierto faktornan. Medionan di komunikashon por trose e bèrdat òf presentá informashon di manera engañoso pa sostené un narativo spesífiko òf pa desakreditá un personahe polítiko. Esaki por kibra e konfiansa di e komunidat den e institushonnan gubernamental i den e proseso polítiko en general, dañando asina e demokrasia i e estado di derechi. Ademas, algun medio di komunikashon por usa táktikanan sensashonalista òf alarmante pa oumentá nan oudiensia i asina generá entrada a kosto di integridat i ophetividat informativo. E práktikanan aki por hasi e polarisashon polítiko mas grave i promové e miedu i deskonfiansa en bes di yuda krea un diálogo konstruktivo i buska solushon.
E posibel influensia negativo di medionan di komunikashon den polítika por yega tambe na e ámbito di retnan sosial. Pa medio di nan ta mas fásil pa hende ku mal intenshon plama notisia falsu i teoria di konspirashon ku por kibra e stabilidat polítiko i kousa problema grave den komunidat. Lamentablemente manipulashon di informashon di parti di medionan di komunikashon ta representá un menasa pa demokrasia i bon gobernashon. Pa atendé e influensia negativo akí ta fundamental pa siudadanonan wak krítikamente di unda un informashon ta bin i nan mester trata na verifiká si un notisia ta bèrdat pa asina yuda promové transparensia na tur nivel.
Manipulashon di informashon di parti di medionan di komunikashon por tin konsekuensia serio pa polítika i pa nos komunidat den su totalidat. Ta responsabilidat di tur hende pa defendé integridat i ophetividat den informashon, i traha huntu pa konstruí un demokrasia fuerte, sólido i konfiabel. Ta un echo ku medionan di komunikashon ta di sumo importansia den e proseso di komprenshon di akshonnan polítiko di kualke gobièrnu, pa medio di kompartí informashon ophetivo i hasi análisis profundo i relevante tokante desishonnan i maneho di gobièrnu. Medionan di komunikashon tin e deber moral i étiko di yuda komprendé e akshonnan polítiko di gobièrnu pa medio di proveé informashon eksakto, hasi análisis den un forma krítiko i krea espasio pa diálogo públiko, semper basá riba informashon hustu i balansá.
No por lubidá riba e ophetivonan prinsipal di medionan di komunikashon, esta informá, eduká, entretené, promové opinion públiko i generá debatenan saludabel. Tumando esaki komo base por konkluí ku medionan di komunikashon ta esensial den e konstrukshon di un sosiedat bon eduká, bon prepará i ku kapasidat di evolushon positivo pa enfrentá diferente reto.